Projektu dezenvolvimentu ekonomiku
Konsellu Ministru aprova ona iha loron 11, fulan Maiu liu ba, Proposta Lei kona-ba Investimentu Privadu no diskuti mos Dekretu rua ne’ebé mak relasiona ho ida ne’e – Dekretu-Lei ne’ebé mak aprova Estatutu Ajénsia Espesializada ba Investimentu nian, no Dekretu Governu nian ne’ebé mak regula Prosedimentu hirak konabá Investimentu Privadu.
Ajénsia Espesializada ba Investimentu nian, bolu naran ‘Invest Timor-Leste’, mak atu troka Institutu Promosaun Investimentu Esternu no Exportasaun no Institutu Apoiu ba Dezenvolvimentu Emprezarial.
Tuir Vise-Ministru Ekonomia no Dezenvolvimentu, Cristiano da Costa, “iha lei foun konabá Investimentu ne’e, ita hanoin atu tau lei rua hirak ulun nian ne’e sai hamutuk deit: Lei Investimentu Esternu no Lei Investimentu Domestiku. Oras ne’e ita sei iha deit lei ida” Cristiano da Costa esplika hodi aumenta tan katak “Lei ne’e hato’o tiha ona ba Parlamentu Nasionál atu bele halo apresiasaun, ita hein katak lei ne’e bele aprova ona iha tinan ida ne’e nia laran”.
Iha Lei foun Investimento Privadu nian ida ne’e halakon tiha investidor sira nia nasionalidade no hela-fatin, hodi bele responde ba nesesidade atu dada investimentu privadu ne’ebé mak boot mai iha País ne’e. “Ho lei ida ne’e ita bele klarifika pozisaun Estadu nian relasiona ho investidor estrajeiru sira, nune’e mos obrigasausn investidor estranjeiru sira nian ba Estadu, no mos konsesaun hirak ne’ebé mak bele halo, direitu arendamentu, buat hirak ne’e hotu iha proposta lei foun ne’e nia laran ne’ebé mak Konsellu Ministru aprova tiha ona iha loron 11 Maio, no katak oras ne’e iha hela Parlamento” Cristiano da Costa hakotu lia.
