Timor-Leste no Portugál asina akordu ba aplikasaun konvensaun seguransa sosiál no Mobilidade Laborál
Ministra Solidariedade Sosiál no Inkluzaun Timor-Leste, Verónica das Dores, no Ministra Traballu, Solidariedade no Seguransa Sosiál Portugál nian, Ana Mendes Godinho, asina akordu administrativu ida, iha loron 2 fulan-outubru kona-ba implementasaun Konvensaun Seguransa Sosiál entre país rua ne’e.
Nune’e mós asina Memorandu Entendimentu ida kona-ba Mobilidade Laborál entre Ministras husi país rua ne’e, no Sekretáriu Estadu Formasaun Profisionál no Empregu (SEFOPE), ho objetivu atu fasilita migrasaun legál traballadór timoroan sira nian ba Portugál, hodi asegura sira-nia direitu laborál no protesaun sosiál.
Konvensaun Seguransa Sosiál entre Timor-Leste no Portugál, ne’ebé asina iha fulan-juñu tinan 2022, aprova ona husi país rua ne’e no sei tama iha vigór iha tempu badak. Konvensaun ne’e ho objetivu prinsipál maka atu garante katak karreira kontributiva traballadór sira nian abranje períodu kontributivu, la sees husi karik sira serbisu ona iha país rua ne’e.
Konvensaun ne’e mós ho objetivu atu asegura tratamentu hanesan entre sidadaun sira husi país rua ne’e, inklui rezidente sira iha país parseiru, hodi fó ba sira direitu no obrigasaun hanesan. Fluksu traballadór aumenta entre Timor-Leste no Portugál sai importante tebes hodi regula relasaun entre sistemas Seguransa Sosiál. Akordu Administrativu ne’ebé asina ona ho objetivu atu regula aspetu espesífiku sira, no fasilita aplikasaun prátika Konvensaun husikedas inísiu ninia vijénsia, no hanesan momentu ida ne’ebé satisfás tebes ba nasaun rua ne’e.
Ministra Verónica das Dores, iha ninia intervensaun, destaka importánsia husi asinatura akordu rua ne’e, ne’ebé “reprezenta pasu importante ida iha realizasaun Direitu Umanu ne’ebé fundamentál, no labele diskute: Direitu ba Traballu Dignu, ho seguransa sosiál!” no “ne’ebé ho objetivu atu asegura realizasaun direitu ba traballu dignu ho seguransa sosiál, ba traballadór no sidadaun timoroan no portugés sira, no garante katak mobilidade no sirkulasaun entre ita-nia país rua ne’e realiza ho seguransa no respeitu ba direitus laborais no protesaun sosiál”.
Nia salienta tan katak “mobilidade boot entre traballadór Timor-Leste no Portugál ezije mós resposta ida iha nivel regulasaun ba relasaun laborál, hodi garante funsionamentu kanál migrasaun legál nian, liuliu traballadór sira ne’ebé hetan ona saláriu, no realizasaun ba protesaun no direitus traballadór sira-ne’e nian”.
Governante ne’e esplika katak Memorandu Entendimentu kona-ba Mobilidade Laborál ho objetivu atu “identifika oportunidade traballu iha Portugál no promove formasaun profisionál no integrasaun efetiva traballadór timoroan sira nian ho dalan legál ho direitu hotu ne’ebé protejidu”, no “ba efeitu ne’e, define ona kanál artikulasaun servisus públikus kona-ba empregu país rua ne’e nian”.
Serimónia asinatura ne’e mós sura ho prezensa hosi Sekretária Estadu Inkluzaun Portugál, Ana Sofia Antunes, Sekretáriu Estadu Seguransa Sosiál Portugál, Gabriel Bastos, Embaixadór Isílio Coelho reprezenta Sekretáriu Ezekutivu CPLP, Embaixadora Timor-Leste ba CPLP, Marina Ribeiro Alkatiri, nomós reprezentante no konvidadu sira seluk.
