Governu Timor-Leste

Sub-distritu Ermera Distritu Ermera sai hanesan loron dala hat ba divulgasaun programa Planu Estratéjiku Dezenvolvimentu Nasionál (PEDN) iha kinta-feira (15/07).

Primeiru-Ministru (PM) Kay Rala Xanana Gusmão ho nia kometiva simu rasik husi administradór sub-distritu Simão F. Piedade Babo no povu sub-distritu ho kostume kultura rai ne’e nian.

Molok atu hahu programa divulgasaun PEDN ne’ebé hato’o husi Xanana Gusmão, iha abertura ba dahuluk administradór sub-distritu Ermera hato’o Jeografia. Sub-distritu Ermera nian fahe ba suku 10, aldeia 62, no rai ne’e foho no fatuk no mós iha tetuk oituan. Maioria populasaun 90% moris iha sgrikultura  nu’udar produtór ba kafé.

Entertantu, durante divulgasaun PEDN populasaun kestiona sira nia preokupasaun liu husi diversu ne’ebé hato’o husi Xefe Suku sira, nune’e Primeiru-Ministru Kay Rala Xanana Gusmão hateten katak iha planu atu hadia rekursus umanus no sei hare’e ba problema sira imediatu no mós tau-matan ba veteran sira hodi kria Konsellu nasionál, distritu, sub-distritu,  suku atu haree ba asuntu veteranu.

Akompaña Primeiru-Ministru iha konsulta PEDN iha sub distritu Ermera Ministra Justisa, Lúcia Lobato, Ministru Saúde, Nelson Martins, Vise-Ministru Finansas, Rui Manuel Hanjam, Sekretáriu Estadu Agrikultura no Arborikultura, Marcos da Cruz, no Sekretáriu Estadu Ambiente Abilio Lima.