Ministru Prezidénsia Konsellu Ministrus fó posse ba komisáriu foun Komisaun Funsaun Públika nian
Ministru Prezidénsia Konsellu Ministru, Agio Pereira, iha loron 3 fulan-outubru tinan 2023, fó pose ba Agapito da Conceição iha Palásiu Governu, Dili, hodi ezerse kargu hanesan Komisáriu Komisaun Funsaun Públika (KFP), ho rejime dedikasaun eskluziva, to’o loron 29 fulan-maiu tinan 2025, tuir indikasaun husi Parlamentu Nasionál, iha eleisaun 29 fulan-agostu tinan 2023.
Agapito da Conceição hanesan “funsionáriu públiku Sekretariadu KFP nian, iha ne’ebé ezerse kargu dirijente”, “koñese di’ak difikuldades, dezafius no kompleksidade misaun ne’ebé nia simu ohin” haktuir Ministru
Agio Pereira hateten katak “hafoin tinan14 ninia ezisténsia, KFP, iha ninia mandatu ba datoluk ona, hasoru dezafiu boot ne’ebé maihusi Programa Governu Konstitusionál da-9 ”, “ne’ebé inklui hasa’e efikásia, efisiénsia no profisionalizmu hosi aparellu Administrasaun Públika, ba prestasaun servisu publikus ne’ebé di’ak-liu, ho kualidade aas, hanesan fatór krusiál hodi redús moris-ki’ak no kria progresu no mós moris-di’ak populasaun nian.
Atu alkansa objetivu hirak-ne’e, Ministru kolia-liu kona-ba “konsesaun no dezenvolvimentu lokál hosi sistema foun ida ba jestaun rekursus umanus ne’ebé abranjente no modernu, “implementasaun ne’ebé nesesáriu no urjente hosi mekanizmu ne’ebé efetivu hodi kontrola tamañu no efisiénsia funsaun públika nian” hodi apoia “prosesu desentralizasaun iha munisípiu sira hotu”, “iha funsaun públika la haliis/parsiál ba ema/grupu ida no adota prinsípiu méritu” no devér atu “fó apoiu ba entidades administrasaun públika iha preparasaun ba ninia pesoál no iha ajustamentu ba ninia prosedimentus, tuir prinsípiu ne’ebé ASEAN konsagra ona”.
Agapito da Conceição hato’o kompromisu atu hala’o ninia funsaun sira “ho izensaun, dedikasaun no responsabilidade tomak no mós tau nafatin konsiderasaun ba interese Estadu, Programa Governu no valores funsaun Públika nian” no kompromete atu “serbisu hodi defende bein públiku no serbí komunidade no povu, ho izensaun, onestidade, profisionalizmu no loloos hodi salva guarda interese nasaun nian.
Serimónia simu pose ne’e, konta ho partisipasaun hosi Sekretáriu Estadu Komunikasaun Sosiál, Expedito Dias Ximenes, Prezidente KFP, Faustino Cardoso Gomes, Komisárius KFP, Fausto Freitas da Silva, Maria de Jesus Sarmento no Carmeneza dos Santos Monteiro, Diretór-Jerál KAK, Luis Ersio de Jesus Ximenes Guterres, Inspetór Jerál Estadu, Francisco de Carvalho, Provedór Diretus Umanus no Justisa, Virgílio Guterres, Xefe Gabinete Ministru Prezidénsia Konsellu Ministrus, Vitor Maia, Diretór-Jerál Administrasaun Prezidénsia Konsellu Ministrus, Pedro Feno no hosi reprezentante sira seluk KFP nian.
