Governu Timor-Leste

Primeiru-Ministru, Kay Rala Xanana Gusmão, ohin, loron 29 fulan-setembru tinan 2023, simu Ministra ba Indo-Pasífiku husi Reinu Unidu, Anne-Marie Trevelyan, iha Palásiu Governu, ne’ebé halo hela vizita ofisiál mai Timor-Leste, husi loron 29 fulan-setembru to’o loron 2 fulan-outubru. Ida-ne’e hanesan vizita dahuluk husi membru Governu britániku ba país ne’e dezde independénsia.

Durante sorumutuk ne’e, diskute ona kestaun oioin hanesan migrasaun laborál no hametin relasoins bilaterais, ho énfaze liu ba área saúde no dezenvolvimentu.

Ministra Trevelyan hateten katak, Reinu Unidu kontinua nakloke hodi simu traballadór timoroan sira, tanba ne’e, presiza fó atensaun atu halo tuir dalan legál. Primeiru-Ministru, Kay Rala Xanana Gusmão, destaka oportunidades empregu iha Reinu Unidu, hodi foka liu esperiénsia husi traballadór sira-ne’e, iha áreas oioin ne’ebé sira serbisu, sei iha mós valór boot ba dezenvolvimentu nasionál.

Ministra ba Indo-Pasífiku, reafirma mós, apoiu Reinu Unidu nian kona-ba Timor-Leste nia adezaun plena ba Asosiasaun Nasoins Sudeste Aziátiku (ASEAN, sigla iha lian inglés).

Durante ninia vizita, Ministra británika ne’e, partisipa iha lansamentu programa konjuntu ida entre Governu Timor-Leste, Governu Reinu Unidu no UNICEF, ne’ebé ho objetivu atu kombate deznutrisaun iha Timor-Leste. Programa ne’e, finansia husi Governu britániku, ho objetivu atu kapasita grupu apoiu ba komunidade hodi identifika kazu deznutrisaun no fornese koñesimentu esensiál ba kuidadór sira kona-ba prátika nutrisionál ba labarik sira.

Anne-Marie Trevelyan partisipa mós iha eventu “Feto iha Lideransa”, rezultadu husi parseria entre Governu Timor-Leste no Feto ONU no hetan finansiamentu husi Reinu Unidu. Inisiativa ida-ne’e ho objetivu atu promove partisipasaun feto sira iha seguransa, rezolusaun konflitu no formulasaun polítika ba dezenvolvimentu.