Governu no Brunei diskute expansaun no fortalesimentu kooperasaun entre país rua ne’e
Ministru Prezidénsia Konsellu Ministrus, Agio Pereira, ohin, loron 28 fulan-setembru tinan 2023, simu Embaixadór Brunei Darussalam iha Timor-Leste, Wan Hadfi Latif, ho objetivu atu konsolida no haboot lasu amizade no kooperasaun entre nasaun rua ne’e.
Dezde estabelesimentu relasoins diplomátikas iha tinan 2002, koneksaun entre Timor-Leste no Brunei karakteriza ona hanesan baze sólidu ida ba entendimentu no kolaborasaun. Relasaun besik entre lider sira iha tempu naruk, liuliu Primeiru-Ministru, Xanana Gusmão, no Sua Majestade Sultaun Hassanal Bolkiah, kontribui maka’as ona ba dezenvolvimentu pozitivu ba lasu amizade hirak ne’e.
Diplomata ne’e hanoin filafali vizita ofisiál Primeiru-Ministru Xanana Gusmão nian ba Brunei iha tinan 2014, no vizita ofisiál seluk tuir mai iha tinan 2017, ne’ebé reforsa kompromisu mútuu hodi promove kooperasaun ida ne’ebé substansiál tebtebes entre nasaun rua ne’e, liuliu dezde hahú misaun diplomátika Brunei nian iha Timor-Leste, iha tinan 2015.
Wan Hadfi Latif salienta mós semellansa entre Brunei no Timor-Leste, hodi destaka ho faktu katak país rua ne’e maka nasaun ki’ik no joven liu iha ASEAN. Aleinde ne’e, realsa kona-ba país rua ne’e nia dependénsia maka’as iha indústria gás no mina-rai, nune’e mós kompromisu hodi diversifika ida-idak nia ekonomia.
Embaixadór ne’e hatudu vontade Brunei nian atu apoia Timor-Leste iha área oioin, ne’ebé inklui saúde, ho disponibilidade hodi simu pasiente timoroan sira ne’ebé ba halo tratamentu espesializadu, edukasaun, ho haruka estudante timoroan sira ba estuda iha Brunei liuhusi atribuisaun bolsa estudu, no iha dezenvolvimentu setór petrolíferu.
Iha ámbitu ekonómiku, Governante no Diplomata ne’e mós ko’alia kona-ba autorizasaun ne’ebé Konsellu Ministrus fó iha fulan ida-ne’e hodi halo asinatura ba memorandu entendimentu ida ho Brunei Darussalam, ne’ebé ho objetivu atu permite traballadór timoroan sira servisu iha indústria oioin iha Brunei. Diplomata rua ne’e ko’alia mós kona-ba empreza Brunei nian ida ne’ebé hatudu ninia interese foin daudauk ne’e atu investe iha Timor-Leste.
