Primeiru-Minstru kontinua hala’o divulgasaun PEDN iha sub-distrito Hatulia
Primeiru-Minstru Kay Rala Xanana Gusmão kontinua hala’o divulgasaun Planu Estratéjiku Dezenvolvimentu iha sub-distritu Hatulia, distritu Ermera, tersa 13/07.
Primeiru-Ministru ne’ebé simu rasik husi Administradór sub-distritu Hatulia, administradór distritu Ermera no povu ho lisan liurai no kultura ninian hodi simu Bainaka importante bainhira hala’o vizita iha sira nia rai.
Molok hahu programa divulgasaun ba Planu Estratéjiku Dezenvolvimentu Nasionál (PEDN), uluk nanain Administradór sub-distritu Hatulia Custódio Soares Martins hato’o kona-ba Jeografia sub-distritu ne’ebé refere katak, loron ohin loron ne’ebé spesial ba komunidade sub-distritu Hatolia tamba hetan tan vizita spesiál husi Primeiru-Ministru nu’udar ulun bo’ot ba veteranus no ba membru Governu sira hotu atu trasa estratéjia hodi hari’i planu dezenvolvimentu fisiku ho nonfisiku iha territóriu Timor-Leste.
Nia mós hatutan katak povu sub-distritu Hatulia, hein ho orgullu tebes ba prezensa Primeiru-Ministru tamba liu husi vizita ida ne’e, hatudu ba povu roman dezenvolvimentu nian ne’ebé sei to’o mai iha loron ida no prontu kopera hamutuk ho Primeiru-Ministru kona-ba Planu Estratéjiku ne’ebé lansa iha teritóriu Timor-Leste. Aproveita okaziaun ida ne’e hodi reprezenta povu sub-distritu Hatulia hakarak informa katak sub-distritu Hatulia sub-distritu ida ne’ebe mak bo’ot liu iha distritu Ermera. Kompostu husi Suku 13, Aldeia hamutuk 59. Total populasaun hamutuk 32.763 (dadus resensiamentu tinan 2008), total uma kain 5.729.
Iha fatin hanesan reprezentante Movimentu Estudante Hatulia (MESHAT), Horacio Borge Romeo iha ninia entrevista hateten katak, sira suporta Governu hodi dada Pipeline Greater Sunrise mai Timor-Leste no tamba ne’e kestaun nasionál.
