Governu Timor-Leste

Ministériu Komérsiu no Indústria (MCI-sigla iha lian portugés), iha loron 22 fulan-setembru tinan 2023, organiza serimónia entrega prémiu edisaun dahaat kona-ba Dezafiu Inovasaun Emprezariál (BIC IV), iha Hotel Timor, Dili.

Edisaun tinan ida-ne’e nian sura ho partisipasaun joven emprendedór na’in-165 husi munisípiu hotu-hotu, ne’ebé reprezenta rejiaun tolu iha Timor-Leste: Leste, Sentrál no Oeste. 

Husi joven na’in-165 ne’ebé partisipa iha atividade programa ida-ne’e nian, na’in tolu maka hetan prémiu husi sira-nia ideias inovadoras. Partisipante sira hotu sei simu subsídiu finanseiru husi Ministériu Komérsiu no Indústria hodi hahú sira-nia negósiu.

Dezafiu Inovasaun Emprezariál ne’e nu’udar parte hosi inisiativa ho títulu “kompeténsia empreendedorizmu no empregu ba juventude” (YEES). Inisiativa ida-ne’e sura ho apoiu finanseiru husi Ajénsia Kooperasaun Internasionál Koreana (KOICA) no Governu, no implementa hamutuk husi Programa Nasoins Unidas ba Dezenvolvimentu (PNUD), MCI, Sekretaria Estadu Formasaun Profisionál no Empregu (SEFOPE), Ministériu Juventude, Desportu, Arte no Kultura no hosi Institutu Nasionál Dezenvolvimentu Emprezariál (IADE). Programa YEES ho objetivu atu kria oportunidade empregu no programa empreendedorizmu ba juventude.

Primeiru-Ministru ein ezersísiu, Mariano Assanami Sabino, motiva joven sira atu duni sira-nia mehi sai emprendedór kriativu no inovadór, maske hasoru dezafius.

 “Ba joven sira ne’ebé hakarak sai emprendedór, presiza haka’as an, dixiplina no dedikasaun. Imi sei hasoru situasaun difisil, maibé bainhira ne’e akontese, imi labele hakiduk. Uza difikuldade ne’e hanesan trampolins atu hetan susesu”, dehan Mariano Assanami Sabino.

Durante serimónia entrega prémiu ne’e, Ministru Komérsiu no Indústria, Filipus Nino Pereira apela ba joven sira atu kontribui ba dezenvolvimentu ekonomia nasionál no destaka katak “joven barak iha kriatividade no inovasaun, maibé sira la iha oportunidade atu aplika sira-nia kompeténsia”. 

 “Bainhira joven sira sai protagonista ba ekonomia nasionál, Timor-Leste sei sai nasaun ida ne’ebé avansada no sustentavel ida, tanba ne’e Governu kompromete ona atu dezenvolve ekonomia bazeia ba kriatividade no inovasaun joven sira nian hodi sustenta ekonomia nasionál”, afirma Filipus Nino Pereira.

Serimónia ne’e sura mós ho prezensa husi Ministru Agrikultura, Pekuária, Peska no Florestas, Marcos da Cruz, Governadór Banku Sentrál, Helder Lopes, Diretór Adjunto KOICA, Kwangsoo Ann no Reprezentante Rezidente Interina PNUD nian, Caitlin Wiesen.