Ministra Saúde Reforsa Kooperasaun Internasionál durante Vizita ba Novaiorke
Ministra Saúde, Élia A. A. dos Reis Amaral, durante ninia vizita ba Novaiorke, iha ne’ebé partisipa iha Asembleia-Jerál Nasoins Unidas (AJNU) nian ba da-78 no eventu sira ne’ebé maka relasiona ho Asembleia-Jerál ne’e iha Novaiorke, Ministra realiza sorumutuk bilaterál oioin ho reprezentante sira husi país oioin no organizasaun sira, hodi hametin kooperasaun internasionál ho objetivu atu fortalese sistema saúde iha Timor-Leste. 
Ho Ministru Saúde Kuba, iha loron 19 fulan-setembru, Ministra Élia Amaral hato’o ninia agradesimentu ba kooperasaun ne’ebé hala’o iha tempu naruk, liuliu iha formasaun ba médiku timoroan sira, ne’ebé fó ona kontribuisaun signifikativa ba dezenvolvimentu rekursus umanus iha setór saúde iha país ne’e. 
Iha loron 20 fulan-setembru, Governante ne’e hala’o sorumutuk ho Ministra Negósius Estranjeirus Japaun, parseiru importante seluk, iha sorumutuk ida ne’e, Ministra Saúde agradese ba apoiu durante pandemia COVID-19, ne’ebé inklui doasaun ambulánsia, vasina no ekipamentu médiku sira, aleindé programa kuidadu maternu-infantíl nian iha Timor-Leste. 
Ho reprezenta sira husi Nepal no Bangladesh, iha loron 21 fulan-setembru, diskute posibilidade sira ba kolaborasaun futura iha área saúde, ho énfaze ba formasaun médiku timoroan sira no programa saúde hamutuk. 
Iha loron 22 fulan-setembru, Ministra Saúde realiza sorumutuk bilaterál oioin ho énfaze ba sorumutuk ho Diretór-Jerál Organizasaun Mundiál Saúde (OMS), Tedros Adhanam Ghebreyesus. Durante sorumutuk ida-ne’e, Élia Amaral agradese ba apoiu kontínuu husi OMS, no solisita apoiu atu halakon malária, denge no moras tropikál sira seluk iha Timor-Leste. OMS reafirma ninia kompromisu atu kontinua apoia fortalesimentu saúde nasionál nian. 
Governante ne’e mós iha oportunidade hodi hala’o sorumutuk ho Ministru Saúde Portugal nian, Manuel Pizarro, iha ne’ebé diskute importánsia kooperasaun kontínua entre Timor-Leste no Portugal, ne’ebé sai ona parseiru sólidu ida ba Timor-Leste, liuliu durante pandemia COVID-19. 
Nafatin iha loron 22 fulan-setembru, diskute mós posibilidade sira ba kooperasaun iha setór saúde, ne’ebé inklui reforsu kapasitasaun ba profisionál sira saúde nian, ho Ministru Indonézia no Maldivas.
Ikusliu, Ministra Saúde Timor-Leste iha sorumutuk ida ho Embaixadora Austrália ba Seguransa Sanitária iha Rejiaun Indo-Pasífiku, Sthepanie Williams, iha ne’ebé nia hato’o ninia agradesimentu ba apoiu husi Austrália ba Timor-Leste iha área saúde, liuliu durante pandemia COVID-19. Austrália kontribui ona ho apoiu tékniku, ekipamentu saúde, infraestrutura no vasina sira kontra COVID-19, ne’ebé hatudu kompromisu kontínuu hodi haforsa sistema saúde Timor-Leste nian. 
