Governu Timor-Leste

Primeiru-Ministru, Kay Rala Xanana Gusmão, iha loron 24 fulan-setembru tinan 2023 hala’o sorumutuk ho Primeiru-Ministru Repúblika Koreia, Han Duck-Soo, iha Hangzhou, iha Xina,  ho objetivu atu hametin no haboot kooperasaun bilaterál entre país rua.

Primeiru-Ministru Xanana Gusmão espresa ninia laran-ksolok ba oportunidade, durante ninia vizita iha Xina, hodi partisipa iha Jogus Aziátikus edisaun da-19 nian, atu halibur belun di’ak sira no diskute kestaun bilaterál sira ne’ebé sei lori benefísiu ekonómiku ba povu no nasaun Timor-Leste. 

Xefe Governu agradese ba apoia ne’ebé Governu Koreia Súl fó, liuhusi KOICA durante ne’e, no destaka projetu ne’ebé projeta ona ba konstrusaun kompleksu desportivu boot haat.

Xanana Gusmão hato’o mós ninia agradesimentu ba Governu no setór privadu Koreia nian ne’ebé fó ona serbisu ba traballadór timoroan rihun ba rihun, hodi oferese ba sira oportunidade no esperiénsia ne’ebé iha folin-boot iha Koreia Súl, ne’ebé kontribui ona hodi hamenus dezempregu iha Timor-Leste.

Primeiru-Ministru Koreia Súl nian reafirma apoiu adezaun plena Timor-Leste nian ba ASEAN no manifesta vontade hodi kontinua apoia Timor-Leste, iha área oioin, liuliu iha desportu, edukasaun, saúde, reflorestasaun, ho objetivu atu kria ambiente ida ne’ebé propísiu (di’ak) ba ekoturizmu iha Timor-Leste. 

Koreia mós kompromete atu kontinua kapasita traballadór timoroan sira, hodi fó oportunidade empregu iha Koreia Súl, iha ne’ebé sira bele hetan esperiénsia ne’ebé hafoin sira bele fahe iha Timor-Leste.