Governu konvida investidores husi Xina atu Investe iha Timor-Leste
Primeiru-Ministru, Kay Rala Xanana Gusmão, no Vise-Primeiru-Ministru, Ministru Koordenadór Asuntus Ekonómikus, no Ministru Turizmu no Ambiente, Francisco Kalbuadi Lay, iha loron 22 fulan-setembru tinan 2023, iha Hangzhou, iha Xina, hala’o ona sorumutuk ida ho reprezentante sira husi setór privadu Xina, Makau no Singapura nian, ne’ebé iha interese atu investe iha Timor-Leste. 
Durante sorumutuk ne’e, investidór sira halo ona aprezentasaun ida kona-ba sira-nia empreza no manifesta sira-nia interese atu investe iha Timor-Leste. 
Primeiru-Ministru aprezenta ona Programa Governu Konstitusionál IX nian, informa ba grupu investidór sira katak Governu iha ninia mandatu durante tinan lima, iha prioridade atu halo dezenvolvimentu ekonómiku, no Timor-Leste nakloke ba investimentu estranjeiru iha área oioin.
Xefe Governu subliña importánsia husi investimentu estranjeiru hodi ajuda dezenvolve infraestruturas no ekonomia nasionál. 
Xanana Gusmão destaka mós katak Governu ninia objetivu atu halo reforma ida kona-ba lejizlasaun ne’ebé liga ba investimentu, atu nune’e garante sistema ida ne’ebé seguru no kredivel ba investidór internasionál sira.
Primeiru-Ministru Xanana salienta hanesan área prioritária sira atu investe iha Timor-Leste, infraestrutura rodoviária (estrada no ponte), bee no aeroportuária, agrikultura, peskas, setór petróleu no gás, liuliu iha esplorasaun ‘greater sunrise’, no área sira seluk. 
“Investidór sira husi setór privadu iha liberdade atu hili área hirak ne’ebé sira hakarak atu investe, no ami sei disponivel hodi fó asisténsia iha área oioin”, deklara Primeiru-Ministru.
Xefe Governu rekoñese ona katak Timor-Leste hasoru dezafiu iha setór oioin no karénsia rekursus umanus, maibé povu no nasaun hakarak avansa hodi hadi’a situasaun ne’e, ho apoiu investimentu husi setór privadu estranjeiru nian.
Sorumutuk ne’e konta ho partisipasaun husi Ministru Administrasaun Estatál, Tomás do Rosario Cabral, Ministru Planeamentu no Investimentu Estratéjiku, Gastão de Sousa, Ministru Juventude, Desportu, Arte no Kultura, Nelyo Isaac Sarmento, Embaixadór Timor-Leste iha Xina, Abrão Santos, Adidu ba Komérsiu no Indústria Timor-Leste iha Xina, Benjamin "SAIMESAK" no eis-Prezidente Kámara Komérsiu no Indústria Timor-Leste (CCI-TL, Sigla iha lian portugés) no atuál Diretór Kompañia Aero Dili nian, Lourenço de Oliveira.
