Ministra Verónica das Dores partisipa iha Sorumutuk Konsellu Komunidade Sósiu-kulturál ASEAN nian ba da-30
Ministra Solidariedade Sosiál no Inkluzaun, Verónica das Dores, partisipa iha Sorumutuk Konsellu Komunidade Sósiu-kulturál ASEAN (ASCC, sigla iha lian Ingleza) nian ba da-30, ne’ebé hala’o iha Jakarta, Indonézia, iha loron 28 no 29 fulan-agostu tinan 2023. 
Eventu ne’e, ho tema “ASEAN ne’ebé Importante: Episentru Kreximentu”, ne’ebé halibur ministru no reprezentante sira husi país membrus ASEAN nian hodi diskute kestaun sósiu-kulturál sira ne’ebé importante tebes, hodi abranje tópiku sira hanesan saúde, edukasaun, mudansa klimátika, reziliénsia sustentável, igualdade jéneru no moris-di’ak ba família. 
Ministra Verónica das Dores hato’o ninia gratidaun ba Estadus-Membrus ASEAN tanba permite Timor-Leste partisipa hanesan membru observadór no aborda tema sira ne’ebé relasiona ho edukasaun, saúde públika, igualdade jéneru no asuntu seluk ba interese komún entre membrus ASEAN. 
Durante sorumutuk ne’e, realsa kompromisu hodi promove prioridade sósiu-kulturál sira, ne’ebé inklui kuidadu no edukasaun iha primeira infánsia no dezenvolvimentu inkluzivu ba ema ho defisiénsia. Realsa mós importánsia hodi hasa’e dezenvolvimentu inkluzivu ida ne’ebé hataan ba nesesidade oioin povu sira ASEAN nian.
Konsellu ASCC rekoñese mós nesesidade ba asaun koordenada ida kontra mudansa klimátika no fortalesimentu ba reziliénsia sustentável, liuliu ba jestaun dezastres iha rejiaun tomak ASEAN nian.
