Governu Timor-Leste

Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, iha loron 8 fulan-setembru tinan 2023, hala’o sorumutuk koordenasaun dahuluk nian ho ministériu sira ne’ebé maka relasiona ho asuntu sosiál, iha Palásiu Governu. Sorumutuk ne’e sura ho partisipasaun husi Ministériu Saúde, Ministériu Edukasaun, Ministériu Ensinu Superiór, Siénsia no Kultura, Ministériu Solidariedade Sosiál no Inkluzaun, Ministériu Asuntus Kombatentes Libertasaun Nasionál, no Ministériu Juventude, Desportu, Arte no Kultura.

Objetivu prinsipál husi sorumutuk ida-ne’e mak atu foti pontu situasaun kona-ba implementasaun programa prioritáriu sira iha loron 120 nia laran hahú husi ninia mandatu. Ministériu ida-idak aprezenta informasaun sira kona-ba programa prioritáriu no medida sira ne’ebé adopta hodi konkretiza sira-nia programas.

Ministériu Saúde aprezenta informasaun sira kona-ba ninia programas prioritárius, inklui kombate denge, tuberkuloze no malnutrisaun, nune’e mós kona-ba hadi’a jestaun distribuisaun ai-moruk no atendimentu ba públiku iha instalasaun sira saúde nian. 

Ministériu Edukasaun destaka esforsu sira atu rezolve kestaun sira ne’ebé relasiona ho profesór kontratadu no voluntáriu sira, nune’e mós hadi’a programa merenda eskolár.

Ministériu Ensinu Superiór, Siénsia no Kultura konsentra hodi hadi’a kualidade ensinu no hasa’e kualifikasaun dosente sira nian iha área linguístika.

Ministériu Solidariedade Sosiál no Inkluzaun tau prioridade ba rezolusaun kestaun pendente ho pagamentu subsídiu sira no seguransa sosiál nian.

Ministru Asuntus Veteranus Libertasaun Nasionál destaka nu’udar prioridade kona-ba rekolla restus mortais hosi antigus kombatentes no halo’ot iha osuárius (fatin hodi rai restus mortais) no mós finalizasaun kona-ba verifikasaun ba dadus pendentes husi antigus kombatentes libertasaun nasionál nian.

Ministériu Juventude, Desportu, Arte no Kultura informa kona-ba avansu sira iha formulasaun polítika sira ne’ebé relasiona ho desportu no arte marsiais, nune’e mós kona-ba esforsu sira atu rezolve dezafius ne’ebé asosiasaun desportiva sira enfrenta.

Durante sorumutuk ne’e, fó énfaze ba importánsia hodi kontinua realiza sorumutuk mensál regulár sira-ne’e no inklui mós entidade sira ne’ebé maka apoia ministériu sira iha área sosiál, atu garante koordenasaun ida ne’ebé efikás no sinkronizasaun ba programas, ne’ebé permite asaun sira ne’e bele hala’o ho di’ak no alkansa objetivus ne’ebé estabelese ona.