Felicia Carvalho simu pose hanesan Vise-Ministra Finansas
Prezidente Repúblika, José Ramos-Horta, ohin, loron 15 fulan-setembru tinan 2023, fó pose ba Felícia Claudinanda da Cruz Carvalho hanesan Vise-Ministra Finansas foun Governu Konstitusionál da-9 nian, iha serimónia ida ne’ebé realiza iha Palásiu Prezidensiál Nicolau Lobato, Dili. 
Felícia Carvalho troka Hélder Lopes, ne’ebé asume pozisaun hanesan Governadór Banku Sentrál Timor-Leste (BCTL, sigla lian portugés) iha loron 13 fulan-setembru liubá. 
Antes ne’e, Felícia Carvalho okupa kargu hanesan asesora eis-Ministra Finansas, Emília Pires nian, no hanesan responsavel ba Unidade Jestaun Parseirus ba Dezenvolvimentu Ministériu Finansas nian. Foin daudaun ne’e, nia dezempeña funsaun asesoria iha Ministériu Solidariedade Sosiál no Inkluzaun.
Hafoin simu pose, Felícia Carvalho hateten: nu’udar “onra boot ida hodi asume kargu hanesan Vise-Ministra Finansas” no agradese “ba konfiansa ne’ebé fó husi Prezidente Repúblika no Primeiru-Ministru”. 
Vise-Ministra foun kompromete mós atu “serbisu hamutuk ho ekipa tomak iha Ministériu Finansas hodi dezempeña serbisu ida ne’ebé di’ak ba povu”.
Primeiru-Ministru, Xanana Gusmão, justifika eskolla Felícia Carvalho bazeia ba ninia koñesimentu kona-ba setór finanseiru no ninia dezempeñu iha Ministériu Finansas.
