Governador foun Banku Sentrál Timor-Leste nian simu pose
Helder Lopes, eis-Vise-Ministru Finansas, ohin, loron 13 fulan-setembru tinan 2023, simu pose hanesan Governadór foun ba Banku Sentrál Timor-Leste (BCTL - sigla iha lian portugés), organizasaun ne’ebé responsavel hodi regula no superviziona setór finanseiru nasionál. 
Governadór foun BCTL nian substitui Governadór sesante, Abraão de Vasconcelos, ne’ebé lidera ona Banku Sentrál husikedas harii, iha tinan 2011, hodi substitui Autoridade Bankária Pagamentu nian ida uluk (ABP). 
Primeiru-Ministru, Kay Rala Xanana Gusmão, iha ninia diskursu durante serimónia, espresa ninia “konfiansa tomak ba Governadór foun Banku Sentrál nian” no hato’o ninia konfiansa katak, Helder Lopes “asume funsaun hodi lidera instituisaun ida-ne’e, ho responsabilidade hanesan ema ida ne’ebé asume kompromisu servisu públiku nian ida ba Estadu no Povu Timor-Leste”.
“Ba relasaun entre Governu Timor-Leste ho Banku Sentrál” Primeiru-Ministru asume “aspirasaun konkreta rua ne’ebé habadak ho liafuan rua: independénsia no kooperasaun!” no katak “ba prestíjiu Estadu Timor, susesu nasaun no futuru timoroan sira nian depende ba relasaun ne’ebé di’ak entre instituisaun rua ne’e”.
Xefe Governu ne’e afirma katak, “setór finanseiru iha papél ne’ebé importante hodi fó kontribuisaun ba dezenvolvimentu ekonómiku Timor-Leste”, Banku sentrál iha responsabilidade atu “mobiliza rekursus poupansa país nian ho efikás no efisiente, nune’e mós halo jestaun ba rekursu kapitál investimentu estranjeiru nian”. Na’i-ulun ne’e mós, hatutan tan katak, “Banku Sentrál iha papél fundamentál ida ba ezekusaun pagamentu, ne’ebé inerente ba dinámika ekonómika no dezenvolvimentu komersiál, motores kreximentu ekonómiku no ninia konsekuénsia, ba moris di’ak sidadaun sira nian. 
Kay Rala Xanana Gusmão termina ninia intervensaun, hodi hato’o ninia konfiansa “katak, Banku Sentrál bele sai parseiru importante ida Governu nian, nu’udar instituisaun ne’ebé sólida no independente, hodi define polítika nasionál sira ne’ebé sei lori país ne’e ba progresu, prosperidade no moris-di’ak Timoroan tomak nian”.
Serimónia simu pose ne’e hala’o iha instalasaun BCTL, iha Dili, no konta ho prezensa husi Primeiru-Ministru, membrus Governu, Parlamentu Nasionál no Konsellu Administrasaun BCTL nian.
