Governu no Provínsia Hunan, Xina Hametin kooperasaun iha Área Agrikultura, Peska, Pekuária, Veterinária no ortikultura
Primeiru-Ministru, Kay Rala Xanana Gusmão, iha loron 10 fulan-setembru tinan 2023, iha Palásiu Governu, Dili, simu Governadór Provínsia Hunan, Mao Weiming, hodi diskute atu loke tan kooperasaun ne’ebé estabelese ona liubá ho provínsia xineza ne’e iha tinan 2014 no tinan 2017. 
Governadór Provínsia Hunan no Governu Timor-Leste planeia hodi intensifika kooperasaun iha tinan lima oinmai, ho objetivu atu hametin ekonomia nasionál, liuliu iha setór agrikultura, peska, pekuária, veterináriu no ortikultura. 
Primeiru-Ministru fó hanoin fali katak sira-nia vizita ba Hunan iha tinan 2014 no tinan 2017 ne’e hamosu ona akordu ne’ebé estabelese ona liubá ho Manatutu iha área agrikultura no sorumutuk ida-ne’e ninia objetivu mak atu diskute espansaun ba programa ida-ne’e nian.
Iha loron liubá, Ministru Administrasaun Estatál, Tomás do Rosário Cabral, Governadór Provínsia Hunan, Mao Weiming, no Administradór Munisípiu Manatutu nian, Bernardo Lopes, lansa ona akordu ida hodi fó kontinuidade ba programa ne’ebé hahú tiha ona iha tinan 2014, hodi hametin kooperasaun entre Hunan no Manatutu iha área agrikultura, ortikultura, pekuária, veterináriu no peska.
Marka mós prezensa iha sorumutuk ne’e Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Ministru Administrasaun Estatál, Tomás do Rosário Cabral, no Ministru Agrikultura no Peskas, Marcos da Cruz.
