Governu Timor-Leste

Governu liuhusi Ministériu Finansas, sei organiza, iha loron 12 fulan-setembru tinan 2023, Jornadas Orsamentais, semináriu ida ne’ebé marka hahú husi preparasaun ba Orsamentu Jerál Estadu (OJE) tinan 2024 nian, iha auditóriu Xanana Gusmão, iha Ministériu Finansas, iha Díli.

Ho tema “Kontinua Konsolida no Transforma Prestasaun Servisu nian liuhusi Melloria Sistema Jestaun no Estratéjia sira Investimentu nian”, objetivu prinsipál husi semináriu ne’e maka atu define prioridade governamentál nian sira no estabelese tetu fizkál ba tinan oin mai.

Jornada Orsamentál sira sei hahú ho diskursu sira abertura nian husi Ministra Finansas, Santina José Rodrigues F. Viegas Cardoso, no husi Primeiru-Ministru, Kay Rala Xanana Gusmão.

Iha sesaun daruak nian, sei ko’alia kona-ba análize situasaun makroekonómika, dezempeñu husi investimentu Fundu Petrolíferu, informasaun sira kona-ba empréstimus husi Parserias Públiku-Privadas (PPP), apoiu husi doadór sira, dezenvolvimentu setór finanseiru iha kontestu konstrusaun Estadu, no papél fundamentál husi Banku Nasionál Komérsiu Timor-Leste (BNCTL-sigla iha lian portugés) iha dezenvolvimentu ekonomia.

Sesaun datoluk nian sei hato’o aprezentasaun prioridade sira ba mandatu IX Governu Konstitusionál, nune’e mós objetivu sira ne’ebé maka sei alkansa. Iha kontestu ida ne’e sei analiza mos prioridades ba tinan oin mai no senáriu sira ne’ebé relasiona ho tetu fiskál tinan 2024 nian.

Iha sesaun ikus nian sei halo diskusaun kona-ba prioridades no tetu fiskál ba 2024, ne’ebé sei taka ho intervensaun husi Primeiru-Ministru.

Eventu ne’e sei konta ho partisipasaun husi membrus hotu Governu nian, husi Prezidente no membrus  husi Parlamentu Nasionál, nune’e mós reprezentantes husi liña ministeriál oin-oin, ajénsias autónomas, autoridades munisipais no sosiedade sivil.