Governu Timor-Leste

Sekretáriu Jerál Nasoins Unidas, António Guterres, iha ninia partisipasaun iha Simeira ba da-13 hosi Asosiasaun Nasoins Sudeste Aziátiku (ASEAN) no Nasoins Unidas, iha sorumutuk Cimeira ASEAN nian ba da-43, ne’ebé hala’o iha Jakarta, Indonézia, iha loron 7 fulan-setembru tinan 2023, ko’alia-liu ba importánsia hosi kooperasaun rejionál no globál atu hasoru dezafius mundu nian. 

António Guterres felisita “ASEAN no ninia Estadu Membru sira ba sira-nia knaar vitál iha konstrusaun pontes entendimentu” no hatutan tan katak “ASEAN sai ona fatór ida importante ba unidade iha mundu ida ne’ebé divididu”, no katak “ita presiza tebetebes ida-ne’e, iha mundu ida ne’ebé multipolar liután, ne’ebé presiza instituisaun multilaterál sira ne’ebé forte, bazeia ba ekuidade, solidariedade no universalidade”. 

Sekretáriu Jerál Nasaun Unidas nian mós destaka nesesidade “kooperasaun ne’ebé metin liután iha ámbitu kestoins klimátikas”, tanba mundu hasoru “risku fragmentasaun nian ne’ebé reál no fratura boot iha sistema ekonómiku no finanseiru mundiál sira”. Nia mós elojia Estadus membrus ASEAN nian, hanesan Indonézia no Vietnam, ne’ebé lidera hela parserias ba tranzisaun enerjétika justa”, ferramenta ida ne’ebé nia konsidera “importante tebes atu hamenus emisoens, hasa’e enerjias renováveis no halo kreximentu enerjia verde”. 

Sekretáriu Jerál Nasaun Unidas mós ko’alia kona-ba situasaun iha Myanmar, hodi hato’o ninia “preokupasaun kle’an ba situasaun polítika, umanitária no direitus umanus ne’ebé sai aat liután iha Myanmar” no reafirma “apelu urjente ba autoridade militár sira Myanmar nian atu rona aspirasaun sira husi ninia povu, liberta prizioneiru polítiku sira hotu no loke dalan hodi fila-fali ba governasaun demokrátika”. 

Iha loron hanesan, Primeiru Ministru, Kay Rala Xanana Gusmão hala’o sorumutuk badak ida ho António Guterres, ne’ebé iha ninia diskursu fó saudasaun ba partisipasaun dahuluk Timor-Leste nian nu’udar observadór iha Cimeira ASEAN.