Primeiru-Ministru no Embaixadora Kuba nian Hametin Kooperasaun iha Área Saúde
Primeiru-Ministru, Kay Rala Xanana Gusmão, hala’o sorumutuk ho Embaixadora Kuba iha Timor-Leste, Grisel Alina Aldama Innis, iha loron 28 fulan-agostu tinan 2023, hodi diskute no reforsa kooperasaun bilaterál, ho foku espesiál iha setór saúde.
Kuba dezempeña ona papél fundamentál ida iha apoiu ba formasaun médiku timoroan sira no iha kapasitasaun sistema saúde nasionál nian, liuhusi haruka médiku no espesialista sira hodi kolabora iha sentrus saúde país ne’e nian. 
Aleinde programa sira setór saúde nian, diskute mós kona-ba projetu kooperasaun entre Ministériu Juventude, Desportu, Arte no Kultura ho Universidade Nacional Timor Lorosa’e (UNTL), hodi haruka alunu timoroan sira atu estuda iha área pedagojia no arte iha Kuba.
Durante sorumutuk ida-ne’e, diplomata ne’e no Xefe Governu esplora mós posibilidade hodi estabelese instalasaun fábrika ai-moruk no ekipamentu médiku nian iha Timor-Leste, hodi haforsa infraestruturas saúde nian iha país ne’e no mellora asesu kuidadus saúde no ai-moruk ba populasaun.
