Primeiru-Ministru hala’o sorumutuk ho Enkarregadu Negósius Embaixada amerikana nian ne’ebé foun
Primeiru-Ministru, Kay Rala Xanana Gusmão no Enkarregadu Negósius Embaixada Estadus Unidus Amérika (EUA) nian ne’ebé foun ba Timor-Leste, Mark Weinstock, hala’o sorumutuk foin ba dahuluk iha loron 28 fulan-agostu tinan 2023, iha Palásiu Governu. Ida-ne’e hanesan sorumutuk dahuluk husikedas diplomata ne’e asume kargu, iha loron 13 fulan-agostu, hodi substitui Tom Daley, ne’ebé konklui ona ninia misaun iha Timor-Leste.
Durante sorumutuk, diplomata ne’e aproveita okaziaun hodi felisita Primeiru-Ministru Xanana Gusmão tanba nia filafali ba nia kargu, no sira -rua diskute kona-ba projetu kooperasaun oin-oin entre Estadus Unidus ho Timor-Leste iha ámbitu dezenvolvimentu, defeza no seguransa nian. 
Mark Weinstock aprezenta rezumu ida kona-ba projetu prinsipál sira ne’ebé dezenvolve ona husi organizasoins norte-amerikanas iha país ne’e, hanesan USAID, Peace Corps no Seebees, foka liu ba impaktu pozitivu ne’ebé sira hetan iha dezenvolvimentu sosiál, ekonómiku, saúde no kulturál Timor-Leste nian durante dékada rua ikus.
Diplomata ne’e reafirma apoiu Estadus Unidus Amérika nian ba adezaun Timor-Leste hanesan membru ASEAN no reafirma ninia kompromisu atu reforsa parseria tempu-naruk ho Timor-Leste no kontribui hodi promove rejiaun Indo-Pasífiku ida ne’ebé pasifika, estavel no próspera liután.
