Konferénsia Xefes Estadu no Governu CPLP nian ba XIV Sentrada iha Tema Juventude no Sustentabilidade
Ministru Negósius Estranjeirus no Kooperasaun, Bendito dos Santos Freitas, akompaña Prezidente Parlamentu Nasionál, Maria Fernanda Lay, iha Konferénsia Xefes Estadu no Governu Komunidade País Lian Portugés (CPLP - Sigla iha Portugés) nian ba dala-14, ne’ebé realiza iha Saun Tomé e Prínsipe, iha loron 27 fulan-agostu tinan 2023. 
Simeira ne’e, dedikada ho tema “Juventude no Sustentabilidade iha CPLP”, ne’ebé marka ho pasajen prezidénsia CPLP nian husi Angola ba Saun Tomé e Prínsipe, nune’e mós reeleisaun ba Sekretáriu Ezekutivu CPLP, Zacarias Albano da Costa, ba biénio (períodu tinan rua), tinan 2023-2025.
Hili tema ida-ne’e reflete kompromisu CPLP nian hodi ko’alia kona-ba kestaun sira ne’ebé afeta ba juventude iha paízes membrus, nune’e mós kria oportunidade atu joven sira bele partisipa ho ativa iha área hanesan edukasaun, negósiu, polítika no dezenvolvimentu sosiál no ekonómiku, nune’e bele kontribui ba promosaun pás no dezenvolvimentu ekonómiku.
Xefes Estadu no Governu CPLP nian simu ho di’ak ba lema ne’ebé eskolla “Juventude no Sustentabilidade iha CPLP” ba konferénsia ida-ne’e no kompromete atu promove diálogu polítiku, troka esperiénsia no halo kooperasaun ho objetivu atu hasa’e realizasaun CPLP nian iha área hotu-hotu. Mobilidade entre Estadus-membrus komunidade ne’e nian nu’udar tema prinsipál ida iha Simeira da-14 CPLP nian. 
Durante eventu ne’e, ko ’alia-liu kona-ba importánsia atu promove diálogu polítiku, kooperasaun no troka esperiénsia entre paízes CPLP, ho foku ba dezenvolvimentu sustentável iha área ekonómika, sosiál no ambientál. Konferénsia ne’e mós selebra aniversáriu Deklarasaun Konstitutiva CPLP nian ba da-27, hodi reafirma kompromisu ho solidariedade, kooperasaun no prinsípius demokrátikus entre país membru sira. 
Iha enserramentu hosi sorumutuk ne’e, Prezidente Repúblika Demokrátika Saun Tomé e Prínsipe, ne’ebé foin eleitu nu’udar Prezidente ba organizasaun ida ne’e nian, Carlos Vila Nova, anunsia katak Konferénsia Xefes Estadu no Governu CPLP nian ba da-15 sei hala’o iha Giné-Bissau.
