Governu Timor-Leste

Ministru Negósius Estranjeirus no Kooperasaun, Bendito dos Santos Freitas, akompaña husi Xefe Misaun Permanente Timor-Leste nian ba CPLP, Embaixadora Marina Ribeiro Alkatiri no Diretór Nasionál CPLP, Aviano Faria, partisipa iha Sorumutuk Konsellu Ministrus Komunidade País Lian Portugés (CPLC- Sigla iha Portugés) nian ba da-28 iha Saun Tomé e Prínsipe, iha loron 25 fulan-agostu tinan 2023. Durante sorumutuk ne’e, Angola ofisiálmente transfere Prezidénsia Rotativa CPLP nian ba Saun Tomé e Príncipe, ne’ebé asume lideransa organizasaun ida-ne’e nian ba mandatu tinan rua, hosi tinan 2023 to’o tinan 2025. 

Konsellu Ministrus CPLP nian mós delibera ona hodi aprova Deklarasaun Saun Tomé e Prínsipe, ne’ebé hili Sustentabilidade no Juventude hanesan tema prinsipál ba ninia mandatu iha tinan rua oinmai.

Sorumutuk ne’e inklui mós aprovasaun ba kandidatura Paraguai nian nu’udár observadór konsultivu iha CPLP no aprovasaun ba orsamentu retifikativu no orsamentu tinan 2024 ba Sekretariadu Ezekutivu CPLP nian, no mós dokumentu relevante sira seluk. 

 Dokumentu sira ne’ebé nu’udar rezultadu husi deliberasaun hirak-ne’e tuirmai sei submete ba konferénsia Xefes Estadu no Governu CPLP nian, ne’ebé marka ona ba loron 27 fulan-agostu tinan 2023.