Governu Timor-Leste

Primeiru-Ministru, Kay Rala Xanana Gusmão, inaugura ofisiálmente espozisaun permanente “Tais Timor”, ne’ebé halo ezibisaun iha Sekretaria Estadu Arte no Kultura, ho tema “Ekspográfiku Tais, Testil Tradisionál Timor-Leste – Patrimóniu Kulturál Imateriál”, iha loron 28 fulan-agostu tinan 2023. 

Inisiativa ne’e organiza husi Sekretaria Estadu Arte no Kultura, ho apoiu husi UNESCO, Feto ONU, Timor AID no Fundasaun Alola, ho objetivu atu promove identidade kulturál nasionál.

Primeiru-Ministru subliña katak “dezafiu boot iha futuru maka atu kuda iha foin-sa’e sira-nia hanoin presiza nafatin prezerva, nafatin hadomi no respeita, saida maka halo ona ita sai ema timoroan” no katak “ita labele haluha ita-nia hun no abut sira”. 

Iha ninia intervensaun, Sekretáriu Estadu Arte no Kultura, Jorge Soares Cristovão, hato’o esperansa katak “espozisaun ida-ne’e sei fanun ita hotu nia hakaran atu prezerva, proteje no promove ita-nia eransa kulturál ne’ebé iha folin ne’ebé boot tebes, liuliu “tais”, no destaka importánsia “ita hotu iha sentidu pertense ba ita-nia kultura, hodi konfirma no defende ita-nia identidade únika hanesan povu, ne’ebé mai husi ita-nia tradisaun no kultura rasik”. 

Serimónia lansamentu ba espozisaun ne’e marka mós prezensa husi membrus Governu no reprezentantes Parlamentu Nasionál, Korpu Diplomátiku no parseiru nasionál no internasionál sira, nune’e mós artezaun/badain, artista no konvidadu sira seluk.