Diretór Seniór ba Parserias Estratéjikas PAM nian vizita Timor-Leste hodi intensifika kooperasaun iha área seguransa alimentár no nutrisaun
Primeiru-Ministru, Kay Rala Xanana Gusmão, no membru Governu balun, iha semana kotuk, hala’o sorumutuk ho Diretór Seniór ba Parserias Estratéjikas Programa Alimentár Mundiál (PAM) nian, Stanlake Samkange, ne’ebé akompaña husi responsavel PAM iha Timor-Leste, Cecilia Garzon, no ninia ekipa, hodi intensifika kooperasaun iha área seguransa alimentár no nutrisaun. 
Stanlake Samkange hala’o vizita mai Timor-Leste, hosi loron 23 to’o 27 fulan-agostu tinan 2023, ho objetivu atu hametin esforsu komún Governu IX Timor-Leste nian, ho PAM no parseiru-xave sira seluk iha área seguransa alimentár no nutrisaun.
Governante no reprezentante sira PAM nian diskute abordajen sira atu kombate inseguransa alimentár no mal-nutrisaun liuhusi investimentu hamutuk iha agrikultura no jestaun bee, kadeia valór ne’ebé sensivel ba nutrisaun no dezenvolvimentu kapitál umanu. 
Durante ninia estadia iha país ne’e, Samkange vizita projetu produsaun foos fortifikadu iha munisípiu Baukau nian, programa ida ne’ebé ho objetivu atu halo ligasaun entre investimentu agríkola no edukasaun liuhusi programa governu nian ba merenda eskolár no ne’ebé konta ho apoiu husi PAM no finansiamentu husi Ajénsia Kooperasaun Internasionál Koreia (KOICA).
Diretór Seniór ba Parseria Estratéjika Programa Alimentár Mundiál hateten katak “PAM iha ona kompromisu hodi apoia objetivu Governu Timor-Leste nian atu dezenvolve kapitál umanu nasionál no halakon hamlaha no deznutrisaun iha país ne’e”. Stanlake Samkange defende mós katak, “investimentu intelijente iha produsaun hahán lokál no hahán saudavel mak importante tebes atu harii kapitál umanu ida ne’ebé forte no saudavel no garante kreximentu ekonómiku ida ne’ebé inkluzivu no prósperu”.
