Timor-Leste no Brazil Asina Akordu Kooperasaun ba Mestradu Foun iha área Edukasaun iha UNTL
Ministru Negósius Estranjeirus no Kooperasaun, Bendito dos Santos Freitas, akompaña husi Vise-Ministra ba Asuntus ASEAN, Milena Rangel, partisipa iha serimónia asinatura akordu kooperasaun no implementasaun projetu entre Timor-Leste no Brazil hodi realiza mestradu iha área edukasaun iha Universidade Nacional Timor Lorosa’e (UNTL). Serimónia ne’e hala’o iha instalasaun Ministériu Negósius Estranjeirus no Kooperasaun nian, iha loron 18 fulan-agostu tinan 2023. 
Akordu kooperasaun téknika ne’e asina husi Ministru Negósius Estranjeirus no Kooperasaun, Bendito Freitas no Embaixadór Repúblika Federativa Brazil nian iha Timor-Leste, Maurício Medeiros de Assis. Akordu implementasaun ba projetu ne’e asina husi Magnífiku Reitór UNTL, João Soares Martins no Embaixadór Maurício Medeiros de Assis.
Projetu ida-ne’e envolve kolaborasaun entre Universidade Federal de Santa Catarina (UFSC) hosi Brazil no UNTL ba implementasaun Mestradu iha área Edukasaun iha Universidade timorense, ne’ebé prevee kona-ba haruka profesór sira husi UFSC mai Timor-Leste, durante tinan rua, hodi fó aulas mestradu nian. Projetu ne’e envolve mós kona-ba haruka profesór timoroan sira bá tuir formasaun iha Brazil.
