Servisu-nain Timór-oan 66 ba tan Korea Sul
Sekretaria Estadu ba Formasaun Profisionál no Empregu (SEFOPE) servisu hamutuk ho HRD (Human Resourses Development) agency Governu husi Ministériu Traballu Korea fasilita tan servisu-nain timór-oan hamutuk 66 (feto 13 no mane 53) ba servisu iha Korea Sul. Serimónia despedida ba servisu-nain timór-oan iha grupu ba dasanulu ne’e hala’o iha Salaun eis CNRT Balide, Dili, iha loron 28 fulan Juñu tinan 2010.
Sekretáriu Estadu ba Formasaun Profisionál no Empregu (SEFOPE) Bendito Freitas hateten iha serimónia despedida ne’e katak “Husu mós ba servisu-nain Timór-oan sira atu lori imajen di’ak Timor-Leste iha Korea. Tanba ho atitudi ne’ebé maluk Timór-oan nian iha Korea sai hanesan matadalan ba Governu Korea atu bele haruka tan servisu-nain timór-oan seluk atu ba Korea.
Iha fatin hanesan Sekretáriu Estadu Promosaun Igualidade (SEPI) Idelta Rodrigues iha nia intervesaun katak feto sira tenke hatudu katak, feto mós bele halo kompetisaun ho mane maluk sira, no husu mós feto sira ne’ebé atu servisu iha Korea bele sai hanesan matadalan ba feto maluk sira seluk.
Totál servisu-nain timór-oan iha Korea hamutuk 238 ne’ebé inklui mós feto hamutuk 25.
