Ministériu Saúde lansa Kampaña Nasionál ba Promosaun Susubeen Inan nian
Ministériu Saúde, kolabora ho Organizasaun Mundiál Saúde, UNICEF no parseiru sira seluk, iha loron 11 fulan-agostu tinan 2023, hahú halo Kampaña Nasionál ba Promosaun Susubeen Inan nian iha Suku Gariuai, Munisípiu Baukau. Kampaña ne’e, hanesan parte husi Semana Mundiál Susubeen Inan nian, no sei loke tan ba munisípiu nasionál sira hotu. 
Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, ko’alia liu importánsia susubeen inan nian hodi kombate deznutrisaun.
Ministra Saúde, Élia A.A. dos Reis Amaral, hato’o ninia gratidaun ba profisionál saúde sira hotu ne’ebé fó apoiu ba inan sira ne’ebé foin hahú fó-susu ba dahuluk no sensibiliza importánsia kona-ba susubeen inan nian.
Reprezentante Organizasaun Mundiál Saúde iha Timor-Leste, Arvind Mathur, hateten katak, eventu ne’e hanesan “selebrasaun magnífika ida iha Semana Mundiál Susubeen Inan nian” no subliña ninia importánsia “atu bele lori mensajen ida-ne’e, aleinde Dili, bele to’o ba sentru munisípiu sira iha Timor-Leste”. “Ida-ne’e la’ós jestu simbóliku ida, maibé hanesan apelu ida hodi halo asaun, lembrete “fó-hanoin-na’in” ida atu bele besik nafatin ba inan sira nia sorin, apoia no kapasita sira atu fó- han no kuidadu sira nia bebe”, reprezentante ne’e afirma. 
Semana Mundiál Susubeen Inan nian maka momentu reflesaun globál ida kona-ba importánsia susubeen inan iha promosaun saúde infantíl. Governu da-9, halo kolaborasaun ho parseiru internasionál sira, reforsa kompromisu hodi garante nutrisaun ida ne’ebé adekuada no saudavel ba labarik sira.
Komemorasaun sira iha tinan ne’e, ko’alia liu papél importante husi família, komunidade, instalasaun saúde no fatin serbisu atu susubeen inan nian bele sai fasil ba inan sira.
