Governu Timor-Leste

Ministru Prezidénsia Konsellu Ministrus, Agio Pereira, simu iha Palásiu Governu, Dili, iha loron 21 fulan-agostu tinan 2023, responsavel husi Korporasaun Finanseira Internasionál (IFC) iha Timor-Leste, David Freedman, ho ninia ekipa hodi ko’alia kona-ba promosaun ba ekonomia ida ne’ebé reziliente, inkluziva no sustentavel liu ba país ne’e. 

Iha sorumutuk ne’e, ekipa IFC halo rezumu ida kona-ba projetu prinsipál sira ne’ebé daudaun ne’e la’o hela iha Timor-Leste no Ministru Agio Pereira aprezenta prioridade prinsipál sira Governu Konstitusionál IX nian.

David Freedman hato’o kompromisu IFC nian atu servisu hamutuk ho Governu hodi hadi’a ekonomia nasionál, aliña inisiativa IFC nian ho prioridade estratéjika ne’ebé deskreve ona iha Programa Governu Konstitusionál IX.

Entre área prioritária sira ne’ebé diskute ona iha sorumutuk ne’e, ko’alia-liu kona-ba promosaun hodi kria empregu liuhusi dezenvolvimentu setór prinsipál sira hanesan turizmu, agronegósiu no indústria, nune’e mós promosaun ba investimentu no abitasaun.

Iha sorumutuk ne’e ko’alia-liu mós kona-ba ekonomia verde, ho foku espesiál ida ba enerjias renováveis, kaptura karbonu no efisiénsia enerjétika. IFC hatudu ninia kompromisu atu kontribui ba dezenvolvimentu sustentavel iha Timor-Leste, hodi ajuda dudu tranzisaun ba ekonomia ida ne’ebé ekolójika no sustentavel liu.

Ko’alia mós kona-ba asesu ba finansiamentu, liuliu kona-ba área sira hanesan abitasaun, finansiamentu beins moveis no dezenvolvimentu kompeténsia no formasaun institusionál. Iha ámbitu ida-ne’e mós Governu iha objetivu atu kria Banku Dezenvolvimentu Timor-Leste, kria entidade ida ne’ebé atu fasilita asesu finansiamentu ho taxa jurus asesíveis.