Governu Timor-Leste

Ministru Komérsiu no Indústria, Filipus Nino Pereira, partisipa iha Sorumutuk Ministrus Ekonomia ASEAN (Asosiasaun Nasoins Sudeste Aziátiku) ba da-55, ne’ebé hala’o iha Semarang, illa Java, iha Indonézia, hosi loron 17 to’o 22 fulan-agostu tinan 2023.

Iha sorumutuk ne’e, ko’alia kona-ba asuntu oioin ne’ebé iha relasaun ho integrasaun ekonómika rejionál no fortalesimentu relasoins entre país-membru sira, no asina akordu importante lima ba kooperasaun ekonómika no komersiál iha rejiaun ne’e.

Entre akordu sira ne’ebé asina ona, foka liu ba konkluzaun hosi susesu iha Kuadru Fasilitasaun Servisus ASEAN (ASFF), ne’ebé sei loke dalan ba mobilidade profisionál ida ne’ebé boot tebes iha setór sira hanesan arkitetura no medisina.

Asina mós akordu daruak ba atualizasaun ida kona-ba Akordu-Kuadru ASEAN, Austrália no Nova Zelándia (AANZFTA) no ratifika ona Estudu kona-ba Akordu-Kuadru Ekonomia Dijitál ASEAN (DEFA), hodi nune’e reforsa kompromisu ho dezenvolvimentu teknolójiku no dijitál iha rejiaun ne’e.

Halo mós ratifikasaun ba Deklarasaun Ministeriál kona-ba Kuadru Inisiativas Industriais Bazeada ba Projetu iha ASEAN no ratifikasaun ba Termus Referénsia ba Estabelesimentu Unidade Apoiu Parseria Ekonómika Rejionál Abranjente (RCEP) nian. 

Durante eventu ne’e, Ministru Filipus Nino Pereira hetan oportunidade hodi halo sorumutuk ho ninia omólogu indonéziu, iha ne’ebé diskute tema oioin ba interese bilateral. Ministru Komérsiu Indonézia, Zulkifli Hasan hato’o ninia apoiu ba Timor-Leste kona-ba adezaun ba ASEAN no Ministru rua ne’e konversa mós kona-ba prosesu ne’ebé la’o hela hodi kria zonas komérsiu livre transfronteirisu entre país rua ne’e.