Governu Timor-Leste

Sekretáriu Estadu ba Protesaun Sivíl, Domingos Mariano Reis, partisipa iha Sorumutuk Ministeriál ASEAN ba da-17 kona-ba Krime Tranznasionál, ne’ebé hala’o iha Labuan Bajo, provínsia Nusa Tenggara Timur (NTT), iha Indonézia, husi loron 20 to’o loron 23 fulan-agostu tinan 2023. 

Eventu ne’e ho objetivu atu hametin kooperasaun no troka informasoins entre país membrus hosi ASEAN ho parseiru sira diálogu nian hodi kombate krime tranznasionál. Iha sorumutuk ne’e sei diskute kestaun sira hanesan terrorizmu, tráfiku umanu, krime sibernétiku, kontrabandu armas, komérsiu ilísitu, tráfiku droga, brankeamentu kapitál, krime ekonómiku internasionál no pirataria.

Aleinde Timor-Leste ne’ebé partisipa hanesan país observadór, eventu ne’e sei marka prezensa mós husi delegasaun país sanulu ASEAN nian, Brunei, Kamboja, Filipinas, Indonézia, Laos, Malázia, Myanmar, Singapura, Tailándia no Vietname. Partisipa mós delegasaun husi país tolu parseiru diálogu ASEAN nian, hanesan Xina, Repúblika Koreia no Japaun.

Delegasaun nasionál ne’e sei fila mai Timor-Leste iha loron 25 fulan-agostu tinan 2023.