Governu Timor-Leste

Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuady Lay, hala’o sorumutuk ida, iha loron 15 fulan-agostu tinan 2023, ho reprezentante Rezidente interina iha Programa Nasoins Unidas ba Dezenvolvimentu (PNUD), Adeline Carrier, no ninia ekipa, ho objetivu atu diskute inisiativa sira ne’ebé hala’o hela iha área dezenvolvimentu ekonómiku no turizmu. Iha sorumutuk ne’e ho foku prinsipál mak atu apoia joven empreendedór sira no dezenvolve kadeia valór ekonomia azúl nian, ho objetivu atu diversifika ekonomia nasionál. 

Durante sorumutuk ne’e, debate mós asuntu oioin relasiona ho dezenvolvimentu ekonómiku sustentavel iha Timor-Leste. Vise-Primeiru-Ministru no ekipa PNUD nian fahe ideia sira kona-ba estratéjias hodi promove empreendedorizmu joven iha país ne’e no dezenvolve kreximentu ekonómiku liuhusi setór turizmu. Ekonomia azúl ne’e, ho nia potensiál atu kria empregu no oportunidade, ne’ebé destaka ona hanesan área prioritária ida atu diversifika ekonomia nasionál.

Vise-Primeiru-Ministru Francisco Kalbuady Lay hateten katak Governu Konstitusionál IX kompromete ona atu harii ekonomia ida ne’ebé diversifikada no forte liután, no subliña katak parseria ho organizasaun sira hanesan PNUD importante tebes hodi alkansa objetivu ida-ne’e.

Adeline Carrier reafirma kompromisu kontínuu PNUD nian hodi servisu hamutuk ho Governu IX no parseiru sira seluk atu dudu diversifikasaun ekonómika no promove oportunidade ne’ebé hanesan ba sidadaun sira hotu.