Governu Timor-Leste

Primeiru-Ministru, Kay Rala Xanana Gusmão, hala’o enkontru lubuk ida, iha loron 14 fulan -agostu tinan 2023, iha Palásiu Governu, ho embaixadór Indonézia, Brazíl, Filipina no Austrália, ho objetivu atu hametin lasu diplomátiku, diskute asuntus bilaterais no aliña kooperasaun ho país sira-ne’e tuir prioridades Governu Konstitusionál IX nian ne’ebé define ona iha ninia Programa.

 .

.

.

Timor-Leste no Indonézia promove dezenvolvimentu ekonómiku iha rejioins fronteira 

Iha sorumutuk ho Embaixadór Repúblika Indonézia iha Timor-Leste, Okto Dorinus Manik, diskute asuntu bilaterál oin-oin, liuliu kona-ba estabelesimentu zona komérsiu livre transfronteirisu (ne’ebé hakat liu limites fronteira país ida nian), ne’ebé daudaun ne’e iha hela prosesu preparasaun husi ekipa téknika país rua nian, ho intensaun atu promove dezenvolvimentu ekonómiku iha rejiaun fronteira entre Timor-Leste ho Indonézia. Inisiativa ida-ne’e, ho objetivu atu fasilita no promove komérsiu transfronteirisu no kooperasaun bilaterál, hodi posibilita promosaun, dezenvolvimentu no reforsu komérsiu, investimentu, turizmu no interkámbiu kulturál entre país rua ne’e.

 .

.

Brazíl hakarak hametin no habelar kooperasaun ho Timor-Leste 

Maurício Medeiros Assis, Embaixadór Brazíl nian iha Timor-Leste, iha sorumutuk ho Primeiru-Ministru Xanana Gusmão, reafirma ninia kompromisu atu kontinua no habelar kooperasaun ezistente ho Timor-Leste. Durante enkontru, sira ko’alia kona-ba área kooperasaun oin-oin hanesan edukasaun no formasaun profisionál, justisa, área militár, saúde no agrikultura.

 .

.

Reforsu kooperasaun ho Filipina atu hametin rekursus umanus no setór agríkola nasionál 

Embaixadora Filipina ba Timor-Leste, Belinda M. Ante, ko’alia liu kona-ba ninia país nia kompromisu atu apoia Timor-Leste iha área oin-oin tuir prioridades Governu nian, liuliu kona-ba fortalesimentu rekursus umanus iha setór públiku no iha setór agríkola. Diplomata ne’e informa mós ba Primeiru-Ministru kona-ba planu atu atrai investidór sira husi Filipina ba Timor-Leste.

 .

.

Timor-Leste no Austrália hametin relasaun bilaterál 

Primeiru-Ministru simu mós vizita husi Enkarregada negósius Embaixada Austrália nian iha Timor-Leste, Caitlin Wilson, hodi diskute kona-ba kooperasaun bilaterál bazeia ba prioridades Governu Konstitusionál IX nian.

Iha enkontru ne’e, diplomata ne’e espresa vontade Austrália nian atu apoia Governu IX hodi alkansa ninia prioridades no mós atu hametin liután relasaun bilaterál durante mandatu.