SEFOPE no PNUD diskute projetu sira ne’ebé la’o hela no área kooperasaun foun iha ámbitu kriasaun empregu no dezenvolvimentu kompeténsia ba joven sira
Sekretáriu Estadu Formasaun Profisionál no Empregu (SEFOPE), Rogério Araújo Mendonça, iha loron 3 fulan-agostu tinan 2023, hasoru malu ho reprezentante rezidente ne’ebé hala’o serbisu iha Programa Nasoins Unidas ba Dezenvolvimentu (PNUD) iha Timor-Leste, ne’ebé akompaña husi responsavel projetu “YEES” – Youth Employment and Entrepreneurship Skills (kompeténsia empriendedorizmu no empregu ba juventude), Hunjai Lee no husi Xefe Unidade Análize Programa PNUD nian, Izzan Fathurrahman.
Iha enkontru ne’e, responsaveis PNUD relata ba Sekretáriu Estadu kona-ba pontu situasaun husi projetu sira ne’ebé la’o hela no diskute área kooperasaun foun iha ámbitu promove kriasaun empregu no dezenvolve kompeténsia ba joven sira.
Entre projetu sira ne’ebé ko’alia ona iha enkontru ne’e, foka liu ba YEES, projetu ida-ne’ebé finansia husi Repúblika Koreia no implementa husi PNUD, ho foku ba dezenvolvimentu aptidaun empriendedorizmu no empregu ba juventude. YEES iha ho objetivu atu kapasita joven sira ho abilidade, koñesimentu no kompeténsia esensiál ba empregu, aleinde oferese orientasaun profisionál, fasilita asesu ba merkadu traballu no promove feiras kona-ba empregu no formasaun empriendedorizmu. Projetu ida-ne’e implementa hela iha munisípiu haat, maka hanesan Dili, Baucau, Ermera no Likisá.
Husi kedas ninia inísiu, iha tinan 2021, programa YEES fó ona estájiu ba joven 250, entre joven sira ne’e 50% hetan ona serbisu. Programa ne’e inklui mós parseria ho empreza internasionál sira iha Repúblika Koreia hodi fornese formasaun empriendedorizmu ba joven timoroan sira bainhira fila ba sira-nia rain, no fornese ba sira kompeténsia atu kria negósiu.
Reprezentante PNUD informa mós katak, iha tinan 2024, sei lansa projetu foun rua, ida iha área turizmu no ekoturizmu no ida seluk dirije ba formasaun painél solár no promove empriendedorizmu.
