Primeiru-Ministru informa ba Prezidente Repúblika kona-ba preparasaun Orsamentu Retifikativu ba tinan 2023
Iha loron 3 fulan-agostu tinan 2023, durante sorumutuk semanál baibain ho Prezidente Repúblika, José Ramos-Horta, Primeiru-Ministru, Kay Rala Xanana Gusmão, aprezenta pontu situasaun kona-ba preparasaun ba proposta Orsamentu Retifikativu. 
Xefe Governu ne’e informa katak seidauk bele fó sai montante ne’ebé presiza, hanoin katak sei halo análize ba proposta Lei ne’e ho kuidadu, atubele entrega ba Parlamentu Nasionál iha semana oin.
Husi kedas loron sesta liubá, liña ministeriál no instituisaun estatál sira aprezenta sira-nia proposta orsamentu ba Komité Revizaun Orsamentál, ho objetivu atu hadi’a ezekusaun jerál ba programa no orsamentu governamentál.
Proposta Lei refere iha hela faze elaborasaun finál no sei submete ba aprovasaun husi Konsellu Ministrus iha sorumutuk loron 9 fulan-agostu no sei entrega ba Parlamentu Nasionál iha loron tuir mai.
Primeiru-Ministru informa ba Xefe Estadu katak Governu mós prepara hela Proposta Lei Orsamentu Jerál Estadu ba tinan 2024, ho objetivu atu hetan ninia aprovasaun to’o finál tinan 2023 nian.
