Prezidénsia Konsellu Ministrus no Komisaun Funsaun Públika ko’alia kona-ba prioridades husi IX Governu ba setór
Ministru Prezidénsia Konsellu Ministrus, Agio Pereira, iha loron 3 fulan-agostu 2023, iha Palásiu Governu, hala’o sorumutuk ho Prezidente Funsaun Públika (CFP-sigla iha lian postugés) Faustino Cardoso Gomes, ne’ebé akompanha husi Komisárias Maria Jesus Sarmento, Carmeneza dos Santos Monteiro no husi Komisáriu Fausto Freitas da Silva Liurai Taci.
Ida ne’e maka sorumutuk ba dahuluk entre Ministru Agio no komisárius husi Komisaun Funsaun Públika, husi kedas tomada pose husi Ezekutivu ne’e no husi aprovasaun orgánika IX Governu Konstitusionál, ne’ebé koloka ona CFP iha superintendénsia no tutela husi Ministru Prezidénsia Konsellu Ministrus. Durante sorumutuk ne’e, Prezidente Komisaun Funsaun Públika no ninia Komisárius entrega ba Governante ne’e, relatóriu sira organizasaun nian no partilla mós informasaun oin-oin ba Ministru kona-ba kestaun sira ne’ebé mak iha relasaun ho funsaun públika, aliña ho prioridade sira ne’ebé define ona iha Programa IX Governu Konstitusionál. 
Entre asuntu oin-oin ne’ebé ko’alia iha sorumutuk ne’e, destaka mós kona-ba prosesu informatizasaun funsaun públika nian, kestaun sira ne’ebé relasiona ho meritokrasia, rekrutamentu, promosaun, selesaun bazeia ba méritu ba kargu sira xefia, jestaun rekursus umanus no avaliasaun dezempeñu nian. Durante sorumutuk, halo mos análize sira kona-ba Funsaun Públika ne’ebé maka tuan ona, nesesidade kona-ba rekrutamentu iha ámbitu ba prosesu adezaun ba ASEAN no aumentu ba aproveitamentu iha ámbitu husi Fundu Dezenvolvimentu Kapitál Umanu husi Funsaun Públika. Kestaun sira seluk ne’ebé maka diskuti iha sorumutuk ne’e, kona-ba patrimóniu no funsionáriu sira husi entidades ne’ebé estinge ona husi orgánika IX Governu, rejime karreira dosente nian no kriasaun ba sistema rekrutamentu eletróniku husi CFP.
Ministru Agio Pereira aprezenta prioridades prinsipais husi Progrma IX Governu Konstitusionál, ho destake espesiál ba prosesu desentralizasaun, kriasaun empregu no formasaun rekursus umanus.
Ministru Prezidénsia Konsellu Ministrus ko’alia kona-ba importánsia boa governasaun no kombate korrupsaun ba dezenvolvimentu nasaun nian, hodi temi liuliu, kona-ba efisiénsia iha setór públiku maka importante atu garante boa governasaun ida servisus púiblikus nian no implementasaun efetiva kona-ba polítika sira ne’ebé trasa ona iha Planu Estratéjiku Dezenvolvimentu no iha Progrma Governu. Agio Pereira, destaka mós kona-ba relevánsia ba realizasaun auditoria sira no mekanizmu hirak ne’ebé maka transparente no responsável iha instituisaun públika sira, atu asegura governasaun ida ne’ebé sólida no atu previne korrupsaun.
