Governu Timor-Leste

Iha loron 1 fulan-agostu tinan 2023, Ministru Prezidénsia Konsellu Ministrus, Agio Pereira, iha Palásiu Governu, Dili, simu Embaixadór Brazil iha Timor-Leste, Maurício Medeiros de Assis, hodi ko’alia kona-ba kooperasaun entre país rua ne’e, ho foku ba projetu ne’ebé dezenvolve ona durante tinan ruanulu ikus ne’e iha Timor-Leste iha setór edukasaun no formasaun profisionál, justisa no área militár. 

Embaixadór Brazil hateten ninia interesse atu kontinua kooperasaun iha área formasaun profisionál, ho Sentru Formasaun iha Bekora, Dili, ne’ebé harii durante tinan barak ho apoiu husi sentru aprendizajen profisionál brazileiru SENAI (Servisu Nasionál Aprendizajen Industriál).

Diplomata brazileiru ne’e mós foka liu ba kooperasaun iha setór justisa, ho apoiu ba dezenvolvimentu Defensoria Públika nasionál, iha área militár ho formasaun téknika ba militár timoroan sira no iha área edukasaun iha parseria ho Universidade Nasionál Timor Loros’ae (UNTL). Ko’alia mós kona-ba projetu kooperasaun ho Sekretaria Estadu Kooperativas hodi kria kooperativa ida ba kréditu no inisiativa hodi kria fábrika aimoruk iha país ne’e.

Embaixadór Brazil subliña lasus fraternus ne’ebé unifika país rua ne’e iha Komunidade Paízes Lian Portugés (CPLP, sigla iha lian portugés) no dezeja susesu ba kandidatura Timor-Leste hodi sai membru plenu iha ASEAN.

Ministru Agio Pereira aprezenta ba diplomata ne’e prioridade prinsipál sira Programa Governo Konstitusionál XI nian, hodi foka liu ba área-xave hanesan dezenvolvimentu ekonómiku, petrolíferu, infraestruturas, formasaun rekursus umanus, desentralizasaun no kriasaun empregu, liuhusi hametin setór privadu nasionál no atrai investimentu estranjeiru.