Ró Patrulla Rua Komponente Navál-F-FDTL Hetan Batizmu
Ministra Finansa Emília Pires no Vise Prezidente Parlamentu Nasionál Maria da Paixão nu’udar inan sarani ba ró patrulla rua komponente Navál F-FDTL nian. Serimónia batizmu ne’e hala’o iha loron 11 fulan Juñu tinan 2010 iha Portu Dili.
Molok serimónia bensa no sarani ró patrulla rua husi padre kapelaun F-FDTL nian, asina uluk akta entrega nian entre Sekretáriu Estadu Defeza, Júlio Tomás Pinto ho reprezentante kompañia Politeknolojia hosi Xina no halo Asaun Rituál Tradisionál nian.
Entre ró rua ne’e, ida hanaran klase Zaco no ida seluk hanaran klase Betanu. Ministra Emília Pires nu’udar inan sarani ba ró patrulla ho klase Zaco no Vise Prezidente Parlamentu Nasionál Maria da Paixão nu’udar inan sarani ba ró patrulla ho klase Betanu. Hafoin serimónia bensa no sarani tuir kedas entrega ró patrulla rua ne’e ba estrutura komponente Navál F-FDTL nian.
Primeiru-Ministru, Kay Rala Xanana Gusmão, iha nia diskursu hateten “Ohin Ita Hakerek tan pájina osan mean ida iha ita nia Nasaun nia istória. Ho serimónia entrega ró-ahi patrulla rua klase Jaco no Betano, reprezenta timór-oan tomak nia vontade forte atu defende soberania Nasionál ho riku-soin tomak Nasaun nian, no nu’udar meiu sira nebé presiza hodi asegura integridade teritoriál no funsionamentu defende fonte rikeza povu tomak nian.” (Atu haree diskursu kompletu, klik iha ne’e)
Iha fatin hanesan Xefe Estadu, Dr. José Ramos-Horta liu husi nia diskursu hateten “Ita nia interese nasionál razaun ida importante teb-tebes, tanba ne’e ita tenke iha duni meiu sira oinsá mak ita bele, tuir ita nia konstituisaun, atu garante ita nia soberania independénsia integridade teritoriál, independénsia soberania integridade teritoriál la’os iha rai maran de’it, maibé iha água teritorial sira no mós buat ne’ebé ita bolu iha direitu internasionál, zona ekonómika eskluziva”.
Partisipa iha serimónia ne’e Prezidente Republika, Dr. José Ramos-Horta, Prezidente Parlamentu Nasionál, Fernando Lasama de Araújo, reprezentante espesiál ONU nian iha Timor-Leste, Sra. Ahmeerah Haq, korpu diplomátiku sira, reprezentante komponente marítima Austrália no Indonésia, membru Governu, membru Parlamentu Nasionál, estudante no populasaun.
