Governu Timor-Leste

Iha loron 31 fulan-jullu tinan 2023, Ministru Prezidénsia Konsellu Ministrus, Agio Pereira, hala’o sorumutuk ho reprezentante Komisaun Anti-Korrupsaun (CAC – sigla iha lian portugés), iha Palásiu Governu, hodi diskute kona-ba preparasaun ba avaliasaun implementasaun Konvensaun Nasoins Unidas kontra Korrupsaun (UNCAC).

Prosesu ne’e envolve avaliasaun país husi Estadu rua seluk, ida maka husi rejiaun jeográfika ne’ebé hanesan ho país avaliadu, no bele, ho sistema jurídiku ne’ebé hanesan. Selesaun ba país avaliadór sira ne’e sei halo liuhusi sorteiu. 

Relatóriu implementasaun UNCAC, ne’ebé tinan kotuk aprezenta ba Gabinete Nasoins Unidas nian kona-ba Droga no Krime (UNODC), iha Viena, Áustria, daudaun ne’e sei revee husi Bulgária no Repúblika Ilhas Marshall.

Iha sorumutuk ne’e, diskute nesesidade atu kria ekipa konjunta ida ne’ebé kompostu husi pontu-fokál husi instituisaun estatál relevante ba prosesu ida-ne’e, ne’ebé sei responsavel ba koordenasaun no organizasaun vizita husi reprezentante Estadus Bulgária no Ilhas Marshall nian.

Reprezentante Estadus-membru UNCAC, Bulgária no Ilhas Marshall, durante ninia vizita iha Timor-Leste, sei avalia progresu no dezafiu sira ne’ebé iha relasaun ho implementasaun polítikas lejizlativas, liuliu kona-ba medidas preventivas (Kapítulu II) no rekuperasaun ativus (Kapítulu V), no mós kona-ba prátika di’ak ne’ebé Timor-Leste adota hodi kombate korrupsaun.

Ministru Prezidénsia Konsellu Ministrus foka liu importánsia governasaun di’ak no kombate korrupsaun ba dezenvolvimentu país nian, no hateten mós katak efisiénsia setór públiku importante tebes hodi garante prestasaun servisu públiku ida di’ak no implementasaun efetiva ba polítika ne’ebé estabelese ona iha Planu Estratéjiku Dezenvolvimentu no iha Programa Governu nian. Ágio Pereira destaka mós importánsia hodi hala’o auditoria no mekanizmu transparente no responsavel iha instituisaun públika hodi asegura governasaun ida ne’ebé metin no prevene korrupsaun iha nivel sosiedade hotu-hotu.

Ministru Agio Pereira ko’alia mós katak ne’e hanesan prioridade tempu badak ida ba Konsellu Ministrus hodi aprova naran sira ne’ebé sei propoin ba Parlamentu Nasionál ba kargu Komisáriu Komisaun Anti-Korrupsaun.

Ekipa CAC ne’ebé hala’o enkontru ho Ministru Agio, maka Diretor-Jerál Servisu Apoiu Kooperasaun, Ersio Guterres, Xefe Unidade Kooperasaun, João Correia, Xefe Unidade Aprovizionamentu, Sérgio Gonçalves no pontu-fokál husi UNCAC, Alexandre Freitas no Augusto Castro.