Ministru Agio Pereira no Timor Resources ko’alia kona-ba esplorasaun no fornesimentu gás naturál
Ministru Prezidénsia Konsellu Ministrus, Agio Pereira, simu Diretora Ezekutiva Timor Resources, Suellen Osborne, hamutuk ho membru Konsellu Administrasaun sira empreza petrolífera ida-ne’e nian, iha loron 25 fulan-jullu tinan 2023, iha Palásiu Governu, Dili. 
Timor Resources serbisu hamutuk ho Timor Gap, empreza petrolífera nasionál, iha esplorasaun mina-rai no gás iha rai-maran (onshore).
Durante sorumutuk ne’e, responsável sira husi Timor Resources halo pontu situasaun kona-ba atividade empreza nian, aprezenta difikuldade sira ne’ebé enfrenta iha tinan hirak ikus ne’e no diskute planu fornesimentu gás naturál, liuhusi rezerva lokál sira, hodi abastese/fornese rede enerjétika nasionál no fornese konsumu doméstiku.
Governante ne’e aprezenta liñas jerais Programa nian, hodi foka liu ba importánsia setór petróleo no rekursus minerais, iha ne’ebé Governu IX, hanesan temi ona iha ninia Programa, hakarak “atu transforma rikezas naturais Timor-Leste nian, liuhusi ninia rai ka ninia tasi, ba seguransa alimentár, saúde, produtividade no oportunidade ba kriasaun empregu”. Na’i ulun ne’e ko’alia mós kona-ba relevánsia dezenvolvimentu setór privadu nasionál no atrai investimentu estranjeiru, prioridade seluk mandatu nian maka atu kria empregu sustentável.
Ministru Agio Pereira asegura mós disponibilidade ba koordenasaun no artikulasaun ho membru Governu relevante sira hodi rezolve lalais ba problema sira ne’ebé mosu.
