Governu Timor-Leste

Iha loron 28 fulan-jullu tinan 2023, Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, simu vizita Embaixadór Japaun nian iha Timor-Leste, Tetsuya Kimura, iha Ministériu Turizmu no Ambiente, Dili.

Durante enkontru ne’e, embaixadór Kimura hato’o ba Vise-Primeiru-Ministru vontade Japaun nian hodi nafatin apoia Timor-Leste iha setór oioin, hanesan agrikultura, infraestruturas no ekonomia. 

Iha ona mós planu hodi haruka tékniku espesialista japonés sira atu apoia ministériu relevante nasionál sira no fornese formasaun iha área turizmu.

Embaixadór Kimura aproveita oportunidade ne’e hodi hato’o konvite ida hosi Governu japonés ba Vise-Primeiru-Ministru Francisco Kalbuadi Lay, atu vizita Japaun no partisipa iha simeira lideres ba komemorasaun aniversáriu da-50 relasoins Japaun ho ASEAN, ne’ebé sei realiza iha fulan-dezembru oinmai.

Durante enkontru, governante no diplomata ne’e diskute programa interkámbiu ba  joven sira hosi país rua ne’e.

Diskute mós projetu infrastruturas boot seluk ne’ebé hetan apoiu hosi Japaun, hanesan projetu reabilitasaun Aeroporto Internacional Presidente Nicolau Lobato nian, ho fó énfaze ba importánsia hosi projetu ida-ne’e no presiza projetu ne’e avansa ho lalais.