Prezidente Repúblika Promulga Orgánika Governu Konstitusionál IX
Prezidente Repúblika, José Ramos Horta promulga Dekretu-Lei n. 46/2023 loron 27 fulan-jullu, ne’ebé aprova Orgánika Governu Konstitusionál IX nian.
Estrutura orgánika Governu Konstitusionál IX nian ne’e, define atribuisaun hirak ne’ebé hala’o hosi Ministériu ida-idak no atribui kompeténsia ba membru Governu sira, tuir prioridade sira ne’ebé fó-sai ona iha ninia Programa.
Governu Konstitusionál IX simu pose iha loron 1 fulan-jullu tinan 2023 liubá, hodi kontinua dalan dezenvolvimentu sosiál no ekonómiku ba períodu tinan lima oin mai. Programa Governu ne’ebé hetan apoiu unánime iha Parlamentu Nasionál, hanesan instrumentu polítiku ida ne’ebé sei gia Governu iha tinan lima oin mai, ho sentidu atu kontinua roteiru ne’ebé Timor-Leste define ona atu halo-tuir “Ajenda tinan 2030 kona-ba Dezenvolvimentu Sustentavel Organizasaun Nasoins Unidas nian” no Planu Estratéjiku Dezenvolvimentu (2011-2030), ho objetivu atu alkansa progresus konkretus dezenvolvimentu sustentavel no dezenvolvimentu sosiál nian ne’ebé efetivu.
Entre prioridade sira ne’ebé Governu Konstitusionál IX estabelese ona, destaka diversifikasaun ekonómika no kriasaun empregu, ho foku iha área sira hanesan agríkola, peska, pekuária, turizmu no estabelesimentu indústria ki’ik no indústria média sira, ne’ebé ho objetivu atu hamenus dependénsia ba importasaun no promove dezenvolvimentu autosustentavel.
Governu ne’e propoin atu investe, ho forma efikás no efisiente, iha área fundamentál tolu - kapitál sosiál, dezenvolvimentu infraestruturas no dezenvolvimentu ekonómiku bazeia ba kuadru institusionál ne’ebé promove kompeténsia, profisionalizmu, onestidade no transparénsia.
Estrutura Governu Konstitusionál IX nia objetivu atu posibilita foku ne’ebé boot liu iha prestasaun servisu báziku sira ba populasaun, liuliu, la’ós de’it, iha saúde no edukasaun, hadi’a metodolojia no operasionalidade iha administrasaun no jestaun, no mós ba implementasaun Planu Estratéjiku Dezenvolvimentu nian.
Hodi asesu Organograma no Orgánika Governu Konstitusionál IX, klik iha ne'e!
Hodi asesu Programa Governu nian, klik iha ne'e!
