Governu Timor-Leste

Ministru Negósius Estranjeirus Singapura, Vivian Balakrishnan, iha segunda-feira, loron 24 fulan-julhu tinan 2023, anunsia ona katak Singapura sei estabelese embaixada ida iha Dili.

Anúnsiu ne’e hato’o durante konferénsia imprensa ida hamutuk ho ninia omólogu timoroan, Bendito dos Santos Freitas, iha Dili, no konsidera ne’e hanesan “marka signifikativu” ida.

Vivian Balakrishnan afirma katak, “medida ne’ebé Timor-Leste kontinua atu dezenvolve hanesan país no nasaun, liuliu ninia adezaun ba ASEAN (Asosiasaun Nasoins Sudeste Aziátiku), ami fiar katak, ne’e momentu ne’ebé adekuadu hodi estabelese embaixada rezidente ida ne’ebé bele sai hanesan pontu fokál ba ita-nia kooperasaun, apoiu no esplorasaun hamutuk ba oportunidade sira iha futuru”.

Tuir komunikadu ida husi Ministériu Negósius Estranjeirus Singapura nian, kooperasaun entre país rua ne’e sei inklui área sira hanesan investimentu, turizmu, defeza no enerjia.

Daudaun ne’e, Singapura iha embaixadór naun-rezidente ida iha Timor-Leste, Robin Hu, ne’ebé sei hala’o nafatin funsaun to’o embaixadór permanente hetan nomeasaun.

Singapura sei sai país da-6 iha ASEAN hodi loke embaixada ida iha Timor-Leste, hamutuk ho Brunei, Filipina, Indonézia, Malázia no Tailándia.

Durante ninia vizita ofisiál mai Timor-Leste, Ministru Vivian Balakrishnan hala’o sorumutuk ho Primeiru-Ministru, Kay Rala Xanana Gusmão, ho Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay no, ho Ministru Negósius Estranjeirus no Kooperasaun, Bendito dos Santos Freitas, nune’e mós ho Prezidente Repúblika, José Ramos-Horta.