Governu Timor-Leste

Ministru Prezidénsia Konsellu Ministrus, Agio Pereira, hala’o sorumutuk ho Enkarregadu Negósius Embaixada Estadus Unidus Amérika nian iha Timor-Leste, Tom Daley, iha loron 27 fulan-jullu tinan 2023, iha Palásiu Governu, Dili.

Iha sorumutuk dahuluk ida-ne’e dezde simu pose Governu Konstitusionál IX nian, diplomata ne’e felisita Ministru ba ninia nomeasaun foun daudaun ne’e hanesan Ministru Prezidénsia Konsellu Ministrus no hatudu vontade Estadus Unidus Amérika nian hodi apoia Governu atu konkretiza ninia prioridade sira, no sei hametin liután relasoins bilaterais durante mandatu Governu Konstitusionál IX nian.

Durante reuniaun ne’e, diskute ona projetu kooperasaun balun entre Estadus Unidus no Timor-Leste. Entre projetu sira ne’e, ko’alia liu projetu reabilitasaun Aeródromu Baukau, nune’e mós parseria ho ajénsia norte-amerikana Millennium Challenge Coorporation (MCC), ne’ebé abranje área importante sira hanesan edukasaun, saneamentu, abastesimentu bee no drenajen.

Ministru Agio Pereira aprezenta ba diplomata amerikanu ne’e, prioridades ba loron dahuluk 120 mandatu nian ne’ebé aprezenta husi Primeiru-Ministru uainhira Ezekutivu ne’e simu pose  no liña jerais Programa Governu nian, no salienta apoiu unánime husi Parlamentu Nasionál.

Entre prioridade sira Ezekutivu nian ne’ebé estabelese ona, foka liu ba dezenvolvimentu ekonómiku, hasa’e setór petrolíferu, investimentu ba infraestruturas, formasaun rekusus umanus, desentralizasaun administrativa, kriasaun empregu no adezaun Timor-Leste ba ASEAN (Asosiasaun Nasoins Sudeste Aziátiku).

Governante ho diplomata ne’e ko’alia mós kona-ba akordu ne’ebé permite Governu Estadus Unidus hodi mantén direitus hodi utiliza rai ba ninia Embaixada iha Dili no, hanesan troka ba ida ne’e, fasilita Governu Timor-Leste hodi halo instalasaun foun ba ninia Embaixada iha Washington, nune’e mós ba ninia misaun hamutuk ho Organizasaun Nasoins Unidas iha Nova Iorke.