Governu Timor-Leste

Organizasaun Saúde Mundiál Sudeste Aziátiku, iha loron 21 fulan-jullu tinan 2023, anunsia katak Timor-Leste hanesan nasaun ida husi país rua iha sudeste aziátiku ne’ebé halakon ezisténsia moras rubéola iha ninia territóriu, nasaun ida seluk maka Butaun.

Anúnsiu ne’e hato’o hafoin enkontru husi Komisaun Verifikasaun Rejionál, ekipa espesialista independente sira ne’ebé hala’o sorumutuk iha Bangkok, Tailándia, iha fulan-juñu. Tuir komunikadu ne’e, Komisaun verifika katak durante tinan tolu liu, Timor-Leste no Butaun hapara ona transmisaun moras rubéola.

Iha tinan 2018 no tinan 2017, Timor-Leste no Butaun halakon moras sarampo, no agora hamutuk ho Maldivas no Sri Lanka alkansa hodi halakon moras sarampo no rubéola to’o tinan 2023, programa prioritáriu OMS nian ida iha Rejiaun Sudeste Aziátiku.

OMS no UNCEF mós rekoñese progresu boot sira ne’ebé nasaun sira iha rejiaun sudeste aziátiku nian alkansa ona iha nivel kobertura nasionál imunizasaun. Kobertura ho vasina doze dahuluk kontra moras sarampo-rubéola iha rejiaun mellora husi 86% iha tinan 2021 ba 92% iha tinan 2022, aumentu 6%. Kobertura doze daruak vasina nian aumenta husi 78% iha tinan 2021 ba 85% iha tinan 2022, aumentu pontu persentajen 7.

Moras rubéola hanesan moras ida ne’ebé kontajioza tebes bele kauza problema saúde ne’ebé sériu no problema irreversível (labele kura) ba bebé-sira ne’ebé foin moris tanba inan husi bebé ne’e infetada ho moras ne’e durante isin-rua.