Governu Timor-Leste

Durante loron rua, Parlamentu Nasionál konsidera no debate ona aspetu oin-oin husi Programa IX Governu Konstitusionál nian no ohin, loron 19-fulan-jullu, debate ne’e termina ona, laiha mosaun sensura ida no ho reprezentante sira husi bankada parlamentar nian ne’ebé hato’o sira nia apoiu, la iha objesaun sira ba Programa ba tinan lima oin mai.

Governu Konstitusionál da-IX, aprezenta ba Parlamentu Nasionál programa boot ida no ambisiozu, ne’ebé hetan lijitimasaun husi votu popular no orienta husi prinsípius demokrátikus no valores fundamentais husi justisa sosiál, igualdade, solidariedade no sustentabilidade, ho objetivu atu hasoru dezafiu sira ne’ebé maka eziste ona no atu promove progresu país nian.

Governu empenhadu atu estimula investimentu, valoriza tesidu emprezariál no kria empregus ho kualidade, ho objetivu atu impulsiona ka motiva dezenvolvimentu ekonómiku nasionál.

Kompromete mos atu hadi’a no reforsa servisu públiku sira, liuliu iha área sira edukasaun, saúde, justisa no seguransa sosiál, hodi garante ba asesu universál ba direitus fundamentais sira ne’ebé maka hatuur ona iha Konstituisaun.

Governu asume firme iha ninia komprimisu sira atu hahú prosesu dezenvolvimentu Greater Sunrise, liuhusi gazodutu ida ba Costa Sul, ne’ebé iha kapasidade atu kria indústria petrolífera ida, dezenvolve rekursus umanus no garante sustentabilidade finansas públikas ba daudaun ne’e no ba tempu oin mai. 

Bainhira aprova Votu Konfiansa, Parlamentu Nasional rekonhese importánsia vitál apoia IX Governu Konstitusionál iha hala’o polítikas no objetivus ne’ebé deliniadu iha ninia Programa Governu nian.

Primeiru-Ministru, Kay Rala Xanana Gusmão, espresa ninia gratidaun ba Parlamentu Nasionál ba demonstrasaun konfiansa nian no reafirma ninia komprimisu atu servisu no la sente kole ba interese públiku no atu onra ba mandatu ne’ebé konferidu husi maioria sidadaun sira nian iha eleisaun sira.

Atu lee diskursu Primeiru-Ministru iha aprezentasaun Programa Governu nian, klike iha ne’e!

Atu haree Programa IX Governu nian, klike iha ne'e