Governu IX felisita Dom Leandro Maria Alves ba ninia elevasaun nu’udar Bispu Dioseze Baukau
Governu Konstitusionál da-9 Timor-Leste hato’o sinsera felisitasoins ba Dom Leandro Maria Alves ba ninia elevasaun nu’udar Bispu Dioseze Baukau, iha serimónia ordenasaun episkopál ne’ebé sei hala’o iha Katedrál Baukau, aban, loron 21 fulan-jullu tinan 2023.
Iha domingu, loron 23 fulan-jullu tinan 2023, oras tuku 09:00, sei hala’o Misa Pontifikál Dahuluk, momentu solene ida ne’ebé marka inísiu servisu episkopál Bispu foun Baukau nian.
Portavós Governu, Ministru Prezidénsia Konsellu Ministrus, Agio Pereira, lori Governu Konstitusionál da-9 Timor-Leste nia naran, hato’o “sinsera felisitasoins ba Dom Leandro Maria Alves ba ninia elevasaun nu’udar Bispu Dioseze Baukau” no dezeja “jornada ida ne’ebé nakonu ho sabedoria no susesu iha lideransa Dioseze nian”, no subliña “konfiansa ne’ebé Dom Leandro Maria Alves sei kontinua hala’o papél ida ne’ebé signifikativu hodi promove moris-di’ak espirituál no sosiál ita-nia povu nian”.
