Ministru Agio Pereira hala’o enkontru dahuluk ho Koordenadora Nasoins Unidas nian
Ministru Prezidénsia Konsellu Ministrus, Agio Pereira, iha loron 13 fulan-jullu tinan 2023, hala’o sorumutuk ho Koordenadora Rezidente Organizasaun Nasoins Unidas nian iha Timor-Leste, Funmi Balogun no ninia ekipa, ne’ebé inklui eis-Vise Ministra Finansas, Sara Lobo Brites, hodi diskute kooperasaun ho Nasoins Unidas tuir prioridades Governu nian.
Iha enkontru dahuluk ida-ne’e, dezde tomada pose husi Governu Konstitusionál IX, Ministru Agio Pereira aprezenta ba Koordenadora Rezidente Nasoins Unidas liñas jerais Programa Governu nian no prioridades ba mandatu ne’e.
Governante ne’e destaka hanesan prioridades, fortalesimentu institusionál, haree liu ba edukasaun, desentralizasaun, kriasaun empregu, redusaun impostus no kriasaun Banku Nasionál Dezenvolvimentu, ne’ebé sei fó kréditu ho juru ki’ik, hodi apoia setór privadu.
Funmi Balogun manifesta vontade husi ajénsia Nasoins Unidas oioin, hodi apoia Timor-Leste iha áreas oinoin tuir prioridades Governu nian.
