Hametin Kooperasaun Militár Timor-Leste ho Indonézia
![visita F-FDTL](https://timor-leste.gov.tl/wp-content/uploads/2010/06/visita-F-FDTL.jpg)
Hametin kooperasaun militar di’ak entre Falintil-Forsa Defeza Timor-Leste nian (F-FDTL) ho Tentara Nasionál Indonézia (TNI), nu’udar objetivu prinsipál hosi vizita mak Major-Jenerál, Taur Matan Ruak, nian ba Indonézia, iha fulan Maiu.
Asuntu sira ne’ebé diskute relasiona ho defeza-militár nian, liu-liu koperasaun iha área seguransa marítima, formasaun/treinu militár (SesKo, Lemhanas) no kordenasaun entre TNI ho F-FDTL iha ámbitu kontrolu zona fronteira sira, liu-liu iha postu F-FDTL nian iha Tunubibi no Tilomar
Koalia kona-ba área marítima nian, Indonézia fo biban ba ofisiál komponente navál hosi Timor-Leste atu haklean sira nia koñesimentu liu hosi formasaun iha SESKOAL (Eskola Komandu Komponente Navál) no formasaun militár nian ho nivél ne’ebé mak a’as liu iha SESKO nomos LEMHANAS ba ofisiál ho postu Major,Tenenti Koronél no Koronél.
Delegasaun F-FDTL nian, inklui mos Xefe Estadu Maior, Komandante Komponente Terrestre no 2º Komandante Komponente Navál, hala’o sorumutu ho Panglima TNI, o Jeneral Djoko Santoso, Xefe Estadu Maior nai tolu hosi Indonésia (forsa Terrestre, Marítima no Aéreu), ho Ministru Defeza Indonésia, Purnomo Yusgiantoro, no Komandante Akademia Indonésia, Major General TNI (MAR) Nono Sampono.
Vizita iha semana ida nia laran ne’e, baseia ba vizita ida ne’ebé hala’o hosi Jenerál TNI Djoko Santoso, mai Timor-Leste iha Setembru tinan kotuk. Iha biban ne’e delegasaun halo vizita mos ba Katedrál Jakarta, Monumentu Nasionál (Monas) no Museu Purna Bakti.