Governu Konstitusionál da-9 simu pose
Prezidente Repúblika, José Ramos Horta, fó pose ba Governu Konstitusionál da-9 ne’ebé lidera husi Primeiru-Ministru, Kay Rala Xanana Gusmão, iha serimónia ida ne’ebé hala’o iha loron 1 fulan-jullu, iha Palásiu Prezidensiál Nicolau Lobato, Dili.
Primeiru-Ministru, Kay Rala Xanana Gusmão, iha ninia diskursu simu pose nian, esplika katak “estrutura orgánika hosi Governu da-9 ne’ebé konsubstansiada iha filozofia, atu kontinua progresu sira ne’ebé alkansa ona to’o tinan 2017 no atu kondús filafali, administrasaun públika ho objetivu sira efisiénsia no efikásia, iha prestasaun servisu sira ba povu no iha prestasaun responsabilidade ba Estadu ne’e”.
Ko’alia liu mós kona-ba vizaun Governu da-9 nian “nasaun ida ne’ebé nia sosiedade próspera no saudavel, instruida no kualifikada, inovadora no dinámika, ho asesu tomak ba beins no servisu esensiál sira no iha ne’ebé maka nia produsaun no empregu iha setór produtivu hotu, korresponde ba ekonomia emerjente ida”.
“Iha ninia Programa, ne’ebé sei aprezenta iha Parlamentu Nasionál, Governu ida-ne’e sei foka ba iha temátika Infraestrutura Bázika sira, tantu iha setór Saúde nune’e mós iha setór Edukasaun, no sei fó énfaze ba Ekonomia, hanesan fatór krusiál no vitál hodi dezenvolve Nasaun ne’e, hahú husi agrikultura, peska, pekuária, turizmu no inisiasaun ba indústria ki’ik no média sira, atu hamenus neineik importasaun ba beins no produtu sira, ne’ebé bele prodús iha país ne’e rasik.
Primeiru-Ministru hateten mós katak “ba tinan lima oin mai, presiza esforsu koletivu ida boot, ne’ebé ezije hosi hothotu, espíritu responsabilidade, dedikasaun, onestidade, persisténsia no korajen ne’ebé boot” no taka ninia intervensaun ne’e, hodi garante katak “tempu to’o ona atu hatuur filafali Timor-Leste no Timoroan sira ba dalan dezenvolvimentu nian”.
Atu lee diskursu Primeiru-Ministru nian, klike iha-ne’e.
