Governu Timor-Leste

Sekretáriu Estadu ba Formasaun Profissionál no Empregu (SEFOPE), Bendito Freitas, inaugura edifísiu foun SEFOPE nian iha rejiaun lima hanesan, Baukau, Same, Gleno, Maliana no Oe-Cusse Ambeno, ne’ebé inaugurasaun konsentra iha edefísiu rejiaun Same, iha loron 11, fulan Juñu tinan 2010.

Iha nia intervensaun, Sekretáriu Estadu, Bendito Freitas, afirma katak “objetivu loke edifísiu SEFOPE foun iha rejiaun lima ne’e atu bele fo asesu di’ak liu-tan ba formasaun profisionál, liu-liu ba joven sira iha rejiaun refere atu bele hetan formasaun no atu hetan dalan ba empregu nian. Tanba ne’e nu’udar polítika desentralizasaun ida, SEFOPE hakarak fo tulun ba joven sira liu husi kapasitasaun formasaun hodi prepara rekursu uumanu iha futuru.”

Iha fatin hanesan Administradór Distritu Manufahi, Filomeno Tilman agradese ba SEFOPE ne’ebé iha kbi’it di’ak hodi foti desizaun loke edifísiu SEFOPE iha rejiaun Manufahi (Same), hodi bele fasilita komunidade Manufahi, aleinde ne’e nu’udar pasu polítika desentralizasaun ne’ebe SEFOPE prepara ona iha parte rekursu uumanu iha rejiaun Manufahi ba futuru nian.

Aleinde inaugura edifisiu lima ne’e, Sekretáriu Estadu, Bendito Freitas, mos fó posse ba pontu responsável SEFOPE rejiaun Baucau, Romando António de Sousa, rejiaun Manufahi, Domingos Mendonça Rodrigues, rejiaun Ermera, Abel da Costa, rejiaun Maliana, Eugénia Moniz, no rejiaun Oe-Cusse Ambeno, Mário Gonçalo.